Daycare centers ipaayo  sa dakbayan sa Mandaue

CEBU, Philippines — Gipahibalo sa kagamhanan sa Siyudad sa Mandaue ang kaandam niini sa pag-ayo sa pipila ka mga daycare centers human sa hangyo sa sektor nga tabangan ang ilang mga yangongo.

Sa panagtigom sa buhatan ni Mayor Thadeo Jovito “Jonkie” Ouano, nagpadayag ang pipila ka mga lider sa daycare workers sa panginahanglan nga ma-repair ang ubang mga daycare centers.

Si Ouano miingon nga andam ang siyudad sa pag-rehabilitate sa maong mga pasilidad apil na usab ang pagbalhin sa maong mga buildings ngadto sa luwas nga area alang sa mga bata.

Nunot niini mapasalamaton ang daycare center workers ngadto sa mayor tungod sa pagtubag sa ilang yangongo ingon man sa paspas nga aksyon niini.

Gawas sa panagtigom gihimo usab ang pagpaila-ila ni Dr. Glydiza Gochoco isip Focal Head sa City Social Welfare Services Office ang bag-ong officers sa Federation of Daycare Workers sa siyudad.

Mitambong sa kalihukan si Executive Secretary Atty. Riczen Gingoyon, pipila ka mga staff sa City Planning and Development Office, City Engineering Office ug Department of General Services.   MEL BANAT NEWS