Death threat

CEBU, Philippines — Namasangil si Gobernador Pamela Baricuatro nga aduna siya’y death threat o hulga sa kinabuhi base sa matud pa iyang nakuha nga intelligence report.

"Intelligence reports indicate that a killer from Mindanao has been paid millions to kill me. If they can't destroy me, next move is to kill me," sumala ni Baricuatro sa iyang Facebook post kagahapong adlawa Pebrero 6, 2026.

Ug diha sab sa maong post iyang giklaro nga wala siyay kalabotan sa pag pagkasuspenso ni Minglanilla Mayor Rajiv Enad. Wala sab ibutyag niini kun unsay koneksyon sa hulga ug sa suspensyon sa mayor.

Sa maong post ni Baricuatro nga gikuyogan pa og hulagway nila duha ni Enad, nagkanayon kini nga dili ra ang bagyong Basyang ang iyang giatubang karon kondili apill pud ang matud pa usa ka "demolition job" para siya dauton.

Matud ni Baricuatro dili na unta siya mopatol pa sa mga Facebook post batok kaniya, apan tungod kay siya gilambigit man sa isyu ni Enad kinsa iyang gihulagway nga "my top performing Mayor," tan-aw ni Baricuatro nga angayan ra nga siya motingog alang sa transparency ug tulobagon.

"I have nothing to do with the suspension of Mayor Rajiv of Minglanilla; I have no motive to do so. Such actions would only disrupt governance," matud sa gobernador.  Wala man gibutyag ni Baricuatro kun unsa nga Facebook post ang nilambigit kaniya sa pagkasuspenso ni Enad, apan sumala sa gobernador nga usa ra kini ka taktika sa iyang mga kontra aron maglagot kaniya ang mga mayor ug mga lokal nga opisyal.

"Mayors, please do not allow malignant whispers to derail our governance. Let us push forward for Cebu. I want you to know I am committed to unity and progress," awhag ni Baricuatro sa mga mayor.

Ang Cebu Police Provincial Office (CPPO) mihimo na karon og beripikasyon sa giingong hulga sa kinabuhi ni Baricuatro.

“First and foremost, mao gyud na atong himoon na i-validate ang mga reported threats aron ma-check pod nato kinsa ng mga tawhana pud,” matud pa ni Police Major Sam Dacullo, information officer of the CPPO sa interbyu sa The Freeman/Banat News.

 Matud pa niya, kun mogawas nga tinuod kining dunay hulga, mas pahugtan nila ang seguridad sa gobernador ilabi na sa mga lakaw niini. Wala pa hinuoy gihatag nga kamandoan kun unsa ilang buhaton, apan paabuton nila ang resulta sa panagtagbo nilang CPPO Provincial Director Police Colonel Abubakar Mangelen Jr. ug sa gobernador aron mahisgutan ang iyang dugang seguridad.

Hinuon giangkon niya nga sila sa kapolisan nasurpresa sa post sa gobernador nga duna kini hulga sa kinabuhi, apan posibleng nakigestorya na ang gobernador sa ilang mga labaw. Nicholas Jon Malaga/IBM BANAT NEWS