Archival mipasalig nga siya mayor sa tanan

CEBU, Philippines — Gipadayag ni Cebu City Mayor Nestor Archival nga andam siyang i-review ang Joint Venture Agreement tali sa kagamhanan sa Dakbayan sa Sugbo ug sa Megawide/Cebu2World Development, Inc. alang sa Carbon Redevelopment Project nga gilagdaan niadtong tuig 2021.

Kini subay sa panawagan sa mga manindahay sa Carbon Public Market pinaagi sa pagpahigayon nila og lihok protesta niadtong Huwebes, Pebrero 5, 2026 ug gipadayag nga ang modernisasyon dili kinahanglan magpasabot og pribatisasyon ug pabiling bukas sa publiko ang maong merkado.

Ang demonstrasyon gipangulohan sa Carbonhanong Alyansa, sa Cebu Market Vendors Multipurpose Cooperative (Cemvedco), sa Cebu City United Vendors Association (CCUVA), ug sa Bato Ermita Community Neighborhood Association Inc. (BECANAI) kun diin naalarma kini bahin sa plano sa C2W nga magsugod na sa dili madugay og pagpangololekta og bayad sa merkado kun diin adunay puruhan nga makapahawa sa mga manindahay ug makapalisod sa mga konsumidor nga daan nang nag-antos sa pagsaka sa presyo sa paliliton.

 “Wala ra koy tutol kay gitan-aw nila ang unsay ilang gihunahuna, that’s free. Pero ang naay uban nga nagsulti nga ang covenant nga among gisign-nan sa una nga molaban mi sa vendors unya wala namo tumana, murag unfair. Pero sige lang, mao man na ilang tan-aw,” suma pa ni Archival.

Gipasalig ni Archival nga naghimo na og resolusyon ang buhatan ni Bise Mayor Tomas Osmeña aron nga matan-aw pagbalik ang kontrata ug mapasabot ang mga bag-ong konsehal.

“What is in accordance with the law, ako nang tumanon kay lisod man sad nga moingon ko nga supak ko ani, akoy ma-question kay usa man ko ka mayor. Being the mayor, ako silang giingnan nga mayor ko sa vendors, mayor pud sa mga negosyante ug sa tanang mga tawo sa Dakbayan sa Sugbo,” suma pa ni Archival.

Gipasabot sab ni Archival nga sa panggobyerno nga demokrasiya, kung unsay nabotohan sa kadagahanan, mao na ang tumanon.

Sa pikas bahin, gipasalig sa mga nagdumala sa Carbon Public Market redevelopment nga magpabilin sa P8.50 matag metro kwadrado ang abang sa mga vendors sa bag-ong pasilidad, bisan pa sa pagbalhin gikan sa kasamtangang merkado.

Ang desisyon naghatag og kasiguruhan sa mga negosyante nga ang ilang panginabuhi ug kita dili kalit maapektohan sa modernisasyon sa merkado.

Gi-anunsyo sa Cebu2World Development Inc. (C2W), kauban ang Megawide Construction Corp., nga ang Office of the City Markets (OCM) gihapon ang modumala sa listahan sa mga vendors ug pag-assign sa ilang stalls.

Ang desisyon nagtinguhang patas ang distribusyon ug walay vendor nga mawagtangan og pwesto.

Gilauman nga mahuman ang redevelopment sa Disyembre 2026, gamit ang precast construction technology aron mapadali ang trabaho ug masiguro ang limpyo, lig-on, ug komportableng pasilidad.

Lakip sa plano ang mas hapsay nga dalan ug moderno nga mga stalls para sa mas komportableng shopping experience sa mamalitay.

Daghang vendor ang nabalaka nga mawad-an sila og pwesto o ba kaha patas-an ang abang sa matag stalls kun hingpit ng pabut-on ang C2W.

Ang Carbon Public Market usa sa pinakadako ug pinaka-aktibong merkado sa Cebu City, diin liboan ka vendor ang nagbaligya og gulay, prutas, isda, ug uban pang produkto.

Ang bag-ong pasilidad gilauman nga makahatag og mas organisado ug komportableng palibot sa tanang mamalitay ug vendor.  IBM BANAT NEWS