Na-stranded tungod ni Basyang
CEBU, Philippines — Moabot og sobra 1,500 ka pasahero ang na-stranded sa nagkadaiyang mga pantalan sa Central Visayas tungod sa Tropical Storm Basyang (Penha) samtang kini nag-irog padulong sa Eastern Mindanao, base sa Tropical Cyclone Bulletin No. 11 sa PAGASA nga gi-isyu alas 5 sa hapon sa Pebrero 5, 2026.
Sa Central Visayas, ubos sa Tropical Cyclone Wind Signal (TCWS) No. 2 ang southern Cebu, lakip ang Samboan, Malabuyoc, Oslob, Ginatilan, Alegria, Dalaguete, Boljoon, Alcoy, Santander, Argao, Badian, Moalboal, Ronda, Alcantara, Sibonga, ug Dumanjug, samtang ang ubang lugar sa Cebu ubos sa TCWS No. 1.
Ang mga lugar sa Signal No. 2 posibleng makasinati og grabe nga hangin ug taas nga balod, samtang sa Signal No. 1, gagmay ra nga epekto ang posibleng masinati.
Gipalapdan usab sa PAGASA ang Yellow Rainfall Warning sa Cebu tungod sa ulan gikan sa bagyo, lakip ang Alcantara, Alcoy, Alegria, Aloguinsan, Argao, Badian, Barili, Boljoon, Dalaguete, Dumanjug, Ginatilan, Malabuyoc, Moalboal, Oslob, Ronda, Samboan, Santander, Sibonga, ug Carcar City. Posibleng magdala kini og moderate hangtod usahay grabe nga ulan, nga makaresulta og pagbaha sa ubos nga lugar ug duol sa sapa.
Sumala sa Coast Guard District Central Visayas (CGDCV), kapin sa 1,535 ka pasahero ang na-stranded niadtong Pebrero 5. Sa 8 a.m., 448 ang stranded, nga nagpabilin hangtod alas 12 sa udto, ug miusbaw sa 639 sa alas 4 sa hapon.
Ubay-ubay sab nga mga barko ug motorbanca ang nanago gikan sa bagyo: 234 ka vessels ug 72 ka MBCAs, samtang 943 ka rolling cargoes, 158 stranded vessels, ug 7 stranded MBCAs ang narecord sa tulo ka reporting period.
Libkason lang kini kun ang Philippine Atmospheric, Geophysical and Astronomical Services Administration (PAGASA) mohatag og advisory nga linaw ug luwas ng mobiyahe sa dagat.
Unom ka Coast Guard stations sa rehiyon ang nag-isyu usab og travel advisories: Northern Cebu, Central Cebu, Camotes, Eastern Bohol, Western Bohol, ug Southern Cebu.
Apektado usab ang air travel, diin ang Mactan-Cebu International Airport Authority (MCIAA) nagkansela sa daghang flights sa Cebu–Siargao ug Cebu–Surigao.
Nagpadayon ang CGDCV sa pagmonitor sa panahon ug dagat uban sa PAGASA, LGUs, ug DRRMOs. IBM BANAT NEWS
- Latest
