Libreng sakay, evacuation centers giandam

CEBU, Philippines — Libreng sakay sa mga bus ang gitanyag sa kagamhanan sa Dakbayan sa Sugbo sugod alas 4:00 sa hapon kagahapon adlawa, Pebrero 5, 2026 aron matabangan ang mga pasahero nga naapektuhan sa epekto sa Bagyong Basyang.

Pinaagi sa Department of General Services (DGS), adunay pito ka mga bus ang nagdagan isip kabahin sa dinaliang tubag nga makauli ang mga lumulupyo sa ilang tagsa-tagsa ka mga panimalay.

Nagsugod og dagan ang mga bus sa dalan Colon kun diin magsilbi kining terminal sa mga pasareho. Ang rota sa habagatang bahin sa syudad mao ang “Bulacao – Colon” nga agi sa N. Bacalso, P. del Rosario, ug Day-as; “Bulacao – SM City Cebu” nga agi sa N. Bacalso, P. del Rosario, Day-as, Imus, ug Gen. Maxilom Extension; “Labangon – Colon” nga agi sa Tisa, Punta, Shopwise, N. Bacalso, ug P. del Rosario; ug “Guadalupe – Colon” nga agi sa Petron Guadalupe, V. Rama, CCMC, Emall, ug Leon Kilat.

Sa amihanang bahin sa syudad nagdagan sab ang mga bus nga adunay ruta nga “Panagdait – Colon” nga agi sa Pope John Paul, Mabolo Church, M.J. Cuenco, ug CTU: “Lahug – Colon” nga agi sa Gorordo, Climaco Avenue, Ramos, ug Junquera; ug “Talamban – Colon” nga sugod sa Gemini Fuel Gas Station ug agi sa Ban-Tal Road, Gorordo, ug M.J. Cuenco.

Sumala pa ni Konsehal David “Dave” Tumulak kinsa tsirman sa Cebu City Disaster Risk Reduction and Management Council nga mopuno pa og pakatap og mga bus kung gikinahanglan.

Sa laing bahin, gipahimangnoan sab ang Visayan Electric Company nga magpatuman og contingency plan ug magpakatap og mga service crew ug heavy equipment aron matutukan ang kuryente sa syudad.

Ang Metropolitan Cebu Water District gipakatap sab ang genset alang sa mga pumping stations.

Ang kagamhanan nipakatap og akop CCDRRMO ug barangay responders sa mga barangay nga kanunay bahaon ug delikado sa pagdahili sa yuta aron dali makaresponde kung adunay emerhensiya.

Excavators ug payloaders nakaposisyon na sa bukirang barangay sama sa Taptap, Mabini, Budlaan, Binaliw, Bonbon, ug Buot aron nga mas paspas ang clearing operation ug pagresponde og emerhensiya.

Gipahibalo sab ni Tumulak nga kung ugaling moigo ang bagyo sa syudad, andam ang mga dagkong mall sa syudad sama SM Seaside, SM City, Ayala Central Bloc, Ayala Center Cebu, Robinsons Galleria ug G-Mall nga mahimong temporaryong kapasilungan sa mga apektadong lumulupyo.

Nangandam na sab ang Cebu City Police Office (CCPO) sigon pa ni Police Lieutenant Colonel Jose Los Baños, tigpamaba sa Cebu City Police Office nga kun dunay bagyo automatic nga i-activate dayon nila ang ilahang Reactionary Standby Force. Gawas niini, naa say Quick Response Team ang matag Police Stations.

Hugot sab nga nakig-alayon ang CCPO sa CCDRRMO ilabi na sa pag-monitor sa flashfloods ug landslide prone areas.

Andam sab ang CCPO nga motabang kun dunay mga insidente nga motumaw. IBM BANAT NEWS