Waste-to-energy facility gitun-an sa Mandaue

CEBU, Philippines — Gitun-an karon sa kagamhanan sa Dakbayan sa Mandaue ang kaugmaran sa waste-to-energy facility isip long term solution sa problema sa paglabay sa mga basura.

Si Mandaue City Administrator Gonzalo "Sally" Malig-on nagkanayon nga nunot niining maong tinguha ilang himuon ang mga pakisusi kalabot sa gitanyag sa usa ka establisamento nga nahimutang karon sa Siyudad sa Lapu-Lapu sa pagtukod usab niini sa Siyudad sa Mandaue.

Matud ni Malig-on nga ang maong establisamento maoy modawat sa ilabay nga mga basura diin himuon usab ang pag-recycle.

 Nunot sa maong tinguha himuon sa mga opisyal sa kagamhanan sa Siyudad sa Mandaue nga pangulohan unya ni Mayor Thadeo Jovito "Jonkie" Ouano ang pagbisita sa plantation sa maong establisamento nga nahimutang karon sa Siyudad sa Lapu-Lapu.

Si Konsehal Carlo Pontico Fortuna nipadayag nga ang kagamhanan sa Siyudad sa Mandaue padayon karon sa pagpangita og mga alternatibong kalabayan sa mga basura.

Gipasabot ni Fortuna nga tumong niini mao nga dili na masubli ang nasinati karong problema sa paglabay sa mga basura human sa pagsirado sa Binaliw Landfill tungod sa nahitabong pagkahugno sa nagtipun-og nga mga basura nga nikalas sa kinabuhi sa ilang mga kawani. BDB BANAT NEWS