Babaye gitigbas patay sa adunay problema sa pangisip

CEBU, Philippines — Patay ang usa ka 39-anyos nga babaye human kini tigbasa sa ilahang silingan nga giingong dunay problema sa panghuna-huna diha sa Purok 3, Barangay Punay, Lungsod sa Aloguinsan niadtong Martes.

Ang biktima mao si Myrna Alingasa Yuson, minyo samtang ang suspetsado mao si Josely Alcontin Abueme, hingkod ang panuigon, ang duha pulos nagpuyo sa maong dapit.

Base sa imbestigasyon sa kapolisan sa Lungsod sa Aloguinsan nga ang biktima nagkuha og picture sa balay sa ilahang silangan kinsa maoy saksi sa hitabo tungod kay gamiton isip rekisitos sa pagpangayo og ayuda sa gobiyerno gumikan kay na biktima usab sila sa bagyong Tino. Gikataho nga kalit lang nga niabot ang suspetsado kinsa nagdala og sundang ug gipangutana ang biktima kon asa iyahang inahan. Ang biktima nitubag kini nga wala siya masayod ug gitigbas kini sa suspetsado makadaghang higayon.

Nakadagan ang biktima apan gigukod gihapon kini sa suspetsadp hinungdan nga ang mga silingan nanawag og polis.

Ang biktima kinsa nakaangkon og mga samad tinigbasan sa lawas daling gidala ngadto sa Aloguinsan Rural Health Unit apan gideklara kining patay na nga naabot sa maong tambalanan.

Ang suspetsado wala kini mosibat ug gikombinsir nga motahan sa iyang kaugalingon ngadto sa mga polis ug nasikop kini. Gikataho nga ang suspetsado adunay record nga nawad-am sa maayong pangisip ug mosugmat-sugmat kini.

Nasayran nga usa usab ka drug surrenderee ang suspetsado ug mogamitan kini og ilegal nga drugas.

Sa laing bahin, patay ang usa ka habal-habal driver human kini pusila sa wala mailhing mamumuno diha sa Purok Sampaguita, Barangay San Roque, Dakbayan sa Talisay kagahapon sa buntag.

Ang biktima giila nga si alyas “Ian”, hingkod ang panuigon, taga Purok Lumboy sa nahisgutang barangay.

Gikataho nga sayo nga nag atang-atang ang kriminal sa biktima ug diha niagi ug nipahinay sa gisakyang motorsiklo ang naulahi gipusil dayon kini.

Si Konsehal Eking Bustillo sa San Roque nibutyag nga unom ka bala ang nidapat ngadto sa lawas sa biktima ug patay na kining naabot sa tambalanan.

Nisuway pa og padagan sa iyang motorsiklo ang biktima apan natumba kini.

Samtang ang kriminal dali kining nisibat sakay sa bisikleta ug padayon pa kining gipangita. Nakuha gikan sa crime scene ang mga kabhang sa bala, deformed slugs ug duha ka putos nga shabu.

Gilantaw karon nga personal nga bangi o kalambigitan sa ginadiling drugas ang motibo sa pagpamusil. — /BDB (BANAT NEWS)