Kaso ni Jun Abines gibasura sa piskaliya

CEBU, Philippines — Gibasura sa Office of the City Prosecutor ang reklamo nga paglapas sa Batas Pambansa Blg. 880 (Public Assembly Act) batok kang Ernesto Sereño Abines Jr., naila usab nga si Jun Abines, tungod sa kakulang sa probable cause ug pagka-invalid sa warrantless arrest.

Sa Disposition on Inquest penetsahan og Enero 30, 2026, mihukom si Assistant City Prosecutor Lei Maurae E. Babatuan nga ang pagdakop kang Abines human sa giingong unauthorized motorcade rally niadtong Enero 29, 2026 wala mosubay sa bisan unsang legal nga eksepsyon nga nagtugot sa warrantless arrest ubos sa Rule 113, Section 5 sa Revised Rules of Criminal Procedure.

Sa nasayan gidakop si Abines mga alas 10:15 sa buntag ug gipasakaan og kaso human sa police operation nga gihimo sa mga sakop sa Cebu City Police Office–Police Station 4.

Atol sa inquest, misalikway si Abines sa pagpirma sa waiver sa iyang katungod ubos sa Article 125 sa Revised Penal Code ug wala mopili sa preliminary investigation, hinungdan nga gisulbad sa piskal ang kaso base lamang sa mga rekord nga gipasaka.

Segun sa asoy sa polis, gi-monitor sa mga awtoridad ang gi-report nga unauthorized motorcade nga naglakip sa mga supporter ni Duterte sayo sa buntag ug sa pagresponde sa sitwasyon, namatikdan ni Patrolman Rob N. Lauron ang duha ka motorsiklo nga giparking sa no-parking area sa J.L. Briones Street, Barangay Carreta, nga giingong hinungdan sa traffic obstruction.

Gihatagan og citation tickets ang mga motorista alang sa traffic violations, human giingong giatubang ni Abines ang opisyal ug gipangutana ang pag-isyu sa mga tiket.

Giila sa mga sakop sa Police Station 4 si Abines isip giingong lider o organizer sa motorcade. Apan, nakita sa prosekusyon nga ang maong pag-ila gibase lamang sa impormasyong gipasa sa laing police unit ug dili sa personal nga kahibalo o direktang obserbasyon sa mga nagdakop nga opisyal.

Matud pa sa resolusyon nga ang in flagrante delicto nga pagdakop nagkinahanglan nga ang krimen mahitabo diha mismo sa atubangan sa nagdakop nga opisyal, samtang ang hot pursuit nga pagdakop nagkinahanglan og personal nga kahibalo nga adunay krimen nga bag-ohay lang nahitabo.

Gipunting usab sa prosekusyon nga bisan base sa asoy ni PMAJ Timothy Jim M. Ramonillas, nga nakaengkwentro sa grupo sa Fuente Rotunda, walay klarong pagmatuod nga adunay public assembly o rally nga aktuwal nga gipahigayon diha sa iyang presensya.

Ang grupo gipugngan lamang sa pagsulod sa maong lugar tungod sa kakulang sa permit ug ongoing nga mga repair, ug human niini gi-report nga padulong na sila sa laing lokasyon.

Giklaro sa resolusyon nga ang mga traffic violation dili igo nga basehan sa pagdakop ubos sa Land Transportation Code. Ang maong mga paglapas nagkinahanglan lang sa pag-isyu og traffic citation ticket ug pagkumpiska sa driver’s license. — /MEL (BANAT NEWS)