Mi-overtake nasampak sa V-hire

CEBU, Philippines — Patay usa ka motorista human siya misampak sa gikasugat nga van diha sa sitio Tangob, Barangay Lagtang, Syudad sa Talisay sa miaging gabii.

Ang namatay mao si alyas Alil, taga Campo 6, Barangay Manipis sa maong Syudad. Samtang ang nagmaneho sa V-hire van mao si alyas Jovert, 26, taga Magdugo, Syudad sa Toledo.

Sa inisyal nga imbestigasyon sa kapolisan nga gikan sa iyang trabaho ang namatay ug padulong na kini nga mopauli.

Gikatahong mi-overtake unta kini sa nag-una nga traysikol  apan sakto pud nga maoy pagbutho sa V-hire diha sa pikas lane nga iyang gisudlan.

Maayong pagkasampak sa biktima sa atubangan sa van hinungdan sa pagka angkon niini og grabeng kadaot sa kalawasan ug sa ulo.

Gidala siya sa Cebu South Medical Center apan nakabsan ra gyud kini sa kinabuhi. Ang drayber sa V-hire ang gikustodiya sa Traffic Division samtang nagpaabot sa desisyon sa kabanay sa namatay. IBM BANAT NEWS