Kaugmaran sa CCMC ipadayon sa sunod semana

CEBU, Philippines — Gitakda nga sugdan sa sunod semana ang pagtiwas sa kaugmaran sa Cebu City Medical Center (CCMC) human niluwat si Cebu City Mayor Nestor Archival, Sr. og “Notice to Proceed” ngadto sa Dakay Construction and Development Corporation.

Ang Dakay Construction mao ang nidaog sa bidding alang sa phase 5 sa proyekto nga naglakip sa pagtiwas sa construction sa ikatulo hangtud sa ikapitong andana sa tambalanan.

Nasayran nga niadtong Disyembre 2025 gipugngan una sa mayor ang kaugmaran sa tambalanan tungod kay dili siya gusto nga magsugod og trabaho base lang sa Program of Works and Estimates unya sa ulahi motungha ang laing mga kuwang.

Matud ni Archival nga kinahanglan nga plantsado ang tanang plano ug responsibilidad sa contractor aron deretso na ang trabaho ug wala na’y masinati nga dugang kakulian tungod kay natanggong na ang construction sa tambalanan sulod sa kapin usa ka dekada.

Gibutyag ni Archival nga karong Pebrero 12, 2026 ang unang adlaw sa pagtrabaho ug gilaoman nga mahuman kini sa Disyembre 2026.

Gigahinan na usab kini og P1.4 bilyones nga pundo human sa gipahigayong komprehensibong evaluation gikan sa mga professional diin gisuta ang tinuod nga kuwang sa proyekto.

Gikataho nga kong mahuman na ang phase 5 sa tambalanan gilaoman sa kagamhanan sa siyudad nga magsugod na sa Enero 2027 ang pag-akumodar og mas daghan pa nga mga pasyente ug mas mapalapdan pa ang ilang serbisyo medikal .

Sa pagkakaron, limitado pa ang kapasidad sa CCMC tungod kay kapin sa 100 ka pasyente lang ang ilang gipangdawat.

Gilaoman usab sa lokal nga kagamhanan ang pagpadayon sa proyekto aron makahatag og dugang trabaho ngadto sa mga Sugboanon ug makapauswag sa kahimtang sa serbisyong panglawas sa siyudad. BDB BANAT NEWS