Pre-trial ni Discaya, mga kauban giuswag

CEBU, Philippines — Giaprobahan sa Regional Trial Court (RTC) Branch 27 sa Dakbayan sa Lapu-Lapu  ang motion sa pag-uswag sa pre-trial nga unang gikatakda kagahapon, Pebrero 3, 2026 sa kaso batok sa contractor nga si Sarah Discaya, tag-iya sa St. Timothy Construction; Maria Roma Rimando, presidente sa kompaniya; ug walo ka opisyal sa Department of Public Works and Highways (DPWH) Davao Occidental District Engineering Office.

Ang mga suspetsadong opisyal sa DPWH mao sila si Rodrigo Larete, Michael Awa, Joel Lumogdang, Harold John Villaver, Jafael Faunillian, Josephine Valdez, Ranulfo Flores, ug Czar Ryan Ubungen.

Gi-reset ni Presiding Judge Nelson Leyco ang pre-trial ngadto sa Pebrero 27, 2026 sa alas 2:00 sa hapon aron hatagan og lima ka setting ang depensa ug prosekusyon sa pagpadayon ug pagkompleto sa pre-marking sa documentary exhibits.

Gitumbok ni Leyco nga ang mga stipulation nga kinahanglang maglakip sa paglungtad, hustong pagpirma, ug authenticity sa mga dokumento.

Ang pre-marking sa husay mao ang mandatory nga proseso sa pre-trial diin nailhan, gitatakan, ug gihan-ay ang mga dokumento uban sa clerk of court sa dili pa magsugod  ang husay.

Lakip niini ang pagtandi sa mga orihinal nga dokumento ug sa ilang mga kopya aron paspas ang proseso, mapamatud-an ang ebidensiya, ug malikayan ang kalangan. Ang mga suspetsado nag-atubang kini og mga kasong kalapasan sa Section 3(e) sa Akta Republika 3019 kun “Anti-Graft and Corrupt Practices Act” ug malversation sa pundo sa gobiyerno pinaagi sa falsification sa commercial documents kalabot sa gialegar nga P96.5 milyones nga ghost flood control project sa Davao Occidental.

Gikataho nga ang tanang suspetsado nitambong sa hearing pinaagi sa online conferencing sa Lapu-Lapu City Bureau of Jail Management and Penology (BJMP) samtang ang ilang mga abogado personal nga nitungha diha sa RTC Branch 27 kagahapon.

Gitugotan ang mga suspetsado nga motambong sa virtual hearings nga paagi gawas kong imando sa korte ang pisikal nilang pagpakita ilabina kon gikinahanglan ang ilang presensiya alang sa pag-ila sa mga dokumento.

Ang Office of the Ombudsman–Visayas nga prosecutor sa kaso nag-andam og lima ka pahina nga pre-trial stipulation alang sa hearing kagahapon.

Apan si Atty. Joseph Randi Torregosa, usa sa mga abogado sa depensa nisumite og motion sa pagsuspende sa pre-trial diin namatikdan nga sukad sa Enero 27, 2026, bag-o pa nagsugod ang prosekusyon ug depensa sa pagrepaso sa documentary exhibits.

Si Torregosa, abogado ni Larete, nihangyo sa korte nga mandoan ang prosekusyon sa paghatag og listahan sa mga dokumento aron mapadali ang mga stipulation.

Nangayo si Torregosa og igong panahon sa korte aron masusi ang mga ebidensiya aron matino kong dawaton ba o supakon kini.

Giaprobahan sa korte ang uswag sa pre-trial ubos sa kondisyon nga ang depensa ug prosekusyon mosumite og joint pre-trial stipulation sa documentary exhibits. BDB BANAT NEWS