252 drug suspects nadakpan sa CPPO

CEBU, Philippines — Nagmalampuson ang usa ka buwan nga Simultaneous Anti-Criminality Law Enforcement Operations (SACLEO) sa Cebu Police Provincial Office (CPPO) nga gasugod sa Enero 1 hangtud sa Enero 31, 2026.

Ubos sa liderato ni CPPO Provincial Director Police Colonel Abubakar Mangelen Udang Jr., ang City ug Municipal Police Stations, Police Intelligence Unit, Provincial Drug Enforcement Unit ug 1st ug 2nd Provincial Mobile Force Company aron paglusad og mga operasyon batok illegal drugs, wanted persons, loose firearms ug illegal gambling.

Kabahin kini sa pagpaniguro sa kaluwasan ug seguridad sa komunidad sa Probinsya sa Sugbo.

Atol sa maong buwan ang CPPO nakapahigayon og 193 anti-illegal drug operations, niresulta kini sa pagdakop sa 252 ka drug personalities, apil ang 236 drug pushers ug 17 ka drug users.

Nakasakmit sab ang otoridad og 357.28 grams nga shabu nga nagkantidad og P2.4 million ingon man 4 grams sa marijuana nga P480 ang balor.

Gitutokan sab ang paghatud sa mga warrant of arrest nga niresulta sa pagkasikop sa 151 ka wanted individuals, apil ang 26 ka Most Wanted Persons sa 154 ka operasyon.

Samtang sa kampanya kontra loose firearms, 62 ka operasyon ang ilang nahimo ug 34 ka tawo ang nadakpan, 26 ka armas ang gi-surrender, 34 ka armas ang nakompiskar ug usa ang gideposito.

Samtang sa kampanya batok illegal gambling, nakatala og 63 ka operasyon diin 115 ang nadakpan ug kapin sa P24, 000 nga bet money ang nasakmit.

“These results are a clear demonstration of our commitment to keep Cebu Province safe. Our personnel worked tirelessly, day and night, to dismantle criminal activities and protect our communities. This is what it means to serve with discipline, dedication, and unity," ni CPPO Provincial Director Police Colonel Abubakar Udang Mangelen Jr. pa. (BANAT NEWS)