Carbon Market, pribado o publiko?

CEBU, Philippines — Nag-viral sa social media ang nahitabong panaglalis tali sa mga gwardiya sa pribadong kompanya ug sa kanhi konsehal sa barangay Ermita sa dakbayan sa Sugbu human nga gisita kini kay gidili daw ang pagkuha og video sa Carbon Public Market.

Ang maong residente nga si Winefredo “Wine” Miro, 50, kinsa kanhi vice chairman sa Carbon-Hanong Alyansa mikwestyon nganong gibadlong siya sa mga gwardiya pagkuha og video sa merkado nga publikong lugar man kini ug dili iya sa kompanyang gitrabahoan sa maong mga gwardiya.

Sumala pa ni Miro, nag-video siya sa Carbon Interim Market para sa school project sa iyang anak adtong tungora apan giduol siya sa tulo ka mga gwardiya  ug gipahunong sa iyang pag-rekord ug gipangayoan siya og permit sa iyang pag-video.

Matud pa niya, wala’y gipakitang sulat, memo, o dokumento ang mga gwardiya nga nagmando sa mga tawo nga bawal ang pagkuha og video sa public market.

Si Miro nagkanayon nga ang mga gwardiya miinsister nga bawal ang pag-video tungod kay pribado ang maong merkado kay ubos kini sa Cebu2World.  Mipasangil sab siya nga giilog sa mga guwardiya ang iyang cellphone.

Matud pa ni Miro daghan nang vloggers ang nagkuha og videos sa maong merkado apan wala man gibadlong apan siya  gibadlong.

Ang Carbon Public Market ug ang Interim Market Building kabahin kini sa redevelopment project sa Carbon pinaagi sa joint venture agreement (JVA) tali sa Cebu City Government ug Cebu2World Development Inc.

“Ipa-klaro ba kung unsay status sa Carbon karon, kung nagpabilin pa ba ning public o private na ba ni?” matud pang Miro.

Human sa maong insidente, nagpagawas og opisyal nga pamahayag ang administrasyon sa Carbon Market nga nagklaro nga gitugotan ang pagkuha og video ug vlogging sulod sa public market premises.

Giangkon sab nila nga dunay lapse in judgment ang maong mga gwardiya, ug giklaro sab nga ang Carbon Public Market dili pribadong merkado kay iya kini sa Cebu City Government.

Samtang ang Cebu2World dili tag-iya kondili partner lamang sa siyudad ubos sa Joint Venture Agreement para sa Carbon Redevelopment Project.

Kun kahinumdoman, Miro usa sa mga nisupak sa privatization sa Carbon Public Market. (BANAT NEWS)