Mayor Enad, VM Peña ug mga konsehal gisuspenso

CEBU, Philippines — Mga kadagkuan sa lungsod sa Minglanilla, lakip na si Mayor Rajiv Enad ug Vice Mayor Lani Peña, gipahamtangan og usa ka tuig nga suspensiyon nga walay madawat nga sweldo tungod sa matud pa wala nila pag-isyu og permit nga may kalabutan sa public safety.

Apil usab sa gisuspenso ang mga konsehal nga sila Jay-R Dela Calzada, Jongjong Adlawan Jr., Jesus 'Boyet' Velez, Jerry Cañares, Jimmy Caumeran, Jenny Young, Jenifer Lariosa, Prose Laput, Petronilo Traya, ug Rick Ryan Zafra.

Ang kaso nagagikan sa aksyon sa lungsod diha sa Sitio Napo, Barangay Guindarohan nga diin nakita ang matud pa mga nangliki nga yuta nga gikabalak-ang moresulta sa landslide.

Sa usa ka mensahe sa mga residente, giingon ni Enad nga lisod apan ang suspension kabahin sa public service.

“If this is the price of doing what’s right for my people, I will stand firm,” matud niya.

Matud pang Enad nga gitahod niya ang proseso sa Ombudsman ug siya magpadayon sa tanang legal nga paagi nga magamit bahin aning maong reklamo batok kanila.

Tungod niini, ang iyang asawa nga si First Councilor Lheslen Enad maoy molingkod isip acting mayor, samtang si Councilor Mulot Laput mopuli isip acting vice mayor  puli kang Peña.

Ang mga bakanteng lingkoranan sa municipal council magpabilin nga bakante gawas kun legal nga mapuno.

Ang maong administrative complaint gipasaka sa mga pribadong kompanya nga Jomara Group of Companies, nga naglakip sa Jomara Konstruct Corporation, Jomara Agrifoods and Supply Corporation, ug Mega Pacific Landfill Resources Corporation.

Sumala sa nilabay nga mga balita, niadtong Oktubre 2024, giingon ni Josue Lapitan, tag-iya sa maong kompanya nga gilangan-langan ug gi-deny ni Enad ang ilang business ug permit applications.

Giisip niya kini nga kalapasan ubos  sa Anti-Graft and Corrupt Practices Act.

Matud pang Lapitan nga nakaimpluwensya sab si Enad kang kanhib Gobernador Gwendolyn Garcia aron i-reject ang quarry application sa iyang pamilya nga maoy ilang negosyo.

Apan si Enad miingon nga ang desisyon sa munisipyo mao ang paghatag og kasigurohan sa public safety, ilabi na nga duna nay nakitang pagpangliki sa yuta sa sa Sitio Napo.

AAng maong suspension order nadawat mismo sa Municipal Session Hall.

Giklaro usab ni Enad nga lahi ang suspension sa bag-ong desisyon sa lungsod nga dili mosugot nga i-dumped ang basura sa Cebu City sa Minglanilla.

“Public service is not about convenience or self-preservation,” matud niya.

Iyang gipasabot nga ang wala nila pagtugot nga anha sa ilang lugar itambak ang mga basura gikan sa laing LGU , kabahin sa ilang responsibilidad  nga panalipdan ang ilang kalikopan, tinubdan sa tubig ug panglawas sa ilang mga konstituwente.

Gisaad ni Enad nga ang tanan nga desisyon sa munisipyo magpadayon sa pag-prioritize sa katawhan sa Minglanilla. (BANAT NEWS)