Tomboy gigulgol

CEBU, Philippines —  Patay na nga napalgan ang usa ka tomboy sa usa ka basakan sa Purok 3, Barangay Omjon, Lungsod sa Valencia, Probinsiya sa Bohol niadtong Biyernes, Enero 30, 2026.

Ang biktima naila sa ngalan nga Charity Albotra, 38, mag-uuma ug nagpuyo sa Barangay Omjon, Lungsod sa Valencia sa maong probinsiya.

Ang nakadiskubre mao ang 60-anyos nga mag-uuma nga si Pelagio Daigdigan nga taga Barangay Omjon sa maong lungsod.

Si Omjon Barangay Captain Calexto Cagat-Cagat mao na sab ang mipahibalo sa kapolisan bahin sa maong patay’ng lawas.

Base sa pasiunang pakisusi sa Valencia Municipal Police Station Bohol Police Provincial Office kataposan kining nakitang buhi nga dunay kainom nga tulo ka lalake pagkahuman nila nang-ani sa basakan.

Nagtagay ang biktima ug ang maong tulo ka mga lalake sa bakante nga balay nga gipanag-iya sa iyaan sa usa sa mga lalakeng kainom.

Matud pa sa silingan nga saba ang biktima ug ang tulo ka mga lalake nga kainom hangtud alas- 3 sa kadlawon.

Apan alas 2:45 sa hapon niadtong Biyernes nadiskubrehan ang patay'ng lawas biktima sa tago nga lugar.

Una niini, gatuo ang kapulisan nga wala'y foul hitabo apan sa ilang paghiling sa lawas adunay nakitang samad sa liog sa biktima. 

Giabis matud pa kini sa sanggot ug gilangkat ang ubol-ubol sa biktima.  Ang tulo ka kainom sa biktima gikonsiderar karon nga mga persons of interest.

Ang usa nila  nisibat  samtang ang laing duha nangangkon nga sayo sila namauli ug nahibilin lang kauban sa biktima mao ang 28-anyos nga nisibat.

Wala gisalikway sa kapulisan ang posibilidad nga gisuwayan og lugos ang biktima apan kay tomboy man posible nga nisukol kini.

Hinoon padayon nga gipalawman sa kapulisan ang ilahang imbestigasyon ilabi na sa sulod sa balay diin sila nag-inom human dunay nakitang daghang dugo.

Ang nasibat kay gikan og Bukidnon ug upat ka tuig pa lang nagpuyo sa maong barangay.

Padayon pa sab nga giimbestigaran sa kapulisan ang duha nga pulos 48-anyos bisan og niingon nga sayo sila niuli.