Frasco: Malampuson ang ATF 2026

CEBU, Philippines —  Gipadayag ni Tourism Secretary  Christina Garcia Frasco nga malampuson ang tulo ka adlaw nga ASEAN Tourism Forum (ATF) nga gipahigayon gikan Enero 28 hangtod 30 sa Cebu City.

Kini tungod sa nakuha nilang positibong feedback gikan sa mga lider sa turismo sa rehiyon may kalabotan sa pag-host sa Pilipinas ug sa kinatibuk-ang kasinatian sa mga delegado.

“We are very happy with the positive feedback from the ministers about the hosting by the Philippines of the ASEAN Tourism Forum and the experience that they have had here in Cebu,” matud ni Frasco sa pakighinabi sa mga tigbalita niadtong Biyernes, Enero 30.

Sumala pa ni Frasco, gipakita sa forum ang abilidad sa Pilipinas sa pag-host og dagkong internasyonal nga kalihokan, samtang gipasigarbo sab ang kultura, maayong pag-atiman, ug halapad nga mga atraksyon sa turismo sa Cebu.

Matud pa niya, ang mga diskusyon atol sa ATF nagtumong sa malungtarong pagpalambo sa turismo, pagpalig-on sa panagtinabangay sa rehiyon, ug pagpaigting sa people-to-people exchanges tali sa mga miyembrong nasud sa ASEAN.

Gitigom sa ATF ang mga tourism minister, senior officials, ug mga stakeholder sa industriya gikan sa tibuok Southeast Asia, ug nahimo kining plataporma sa paghiusa sa mga polisiya ug inisyatiba nga way laing tumong kondili ang palamboon ang intra-ASEAN travel.

Dugang pa ni Frasco, ang malampusong pag-host sa ATF nagpalig-on sa Pilipinas sa pagpalambo sa mas lig-on, inklusibo, ug makaparang nga sektor sa turismo sa ASEAN nga makahatag og benepisyo sa lokal nga komunidad ug mga nanginabuhi sa turismo.

Samtang, taliwala sa mga panawagan sa iyang mga kritiko nga siya mo-resign, miingon si Frasco nga nagpadayon siyang nagbaton sa pagsalig ug kumpiyansa ni Presidente Ferdinand R. Marcos Jr., subay sa klarong suporta nga gipadayag sa Malacañang.

“I believed the matter has been clearly addressed by the Palace and that has yielded that I continue to enjoy the President’s trust, I am very grateful with that,” matud ni Frasco sa usa ka interbyu human sa paglunsad sa ASEAN Tourism Forum (ATF) niadtong Enero 28, 2026.

Gipasalamatan usab ni Frasco ang iyang mga kauban sa gobiyerno ug ang mga stakeholder sa sektor sa turismo samtang nagpadayon ang Department of Tourism sa pagpatuman sa mga programa ug inisyatiba niini.

“Nagpasalamat sad ko sa atong kaigsoonang Sugbuanon nga padayon gayud nga nagpakita sa ilang kaligdong isip Sugbuanon. Ilang gipakita gayud ang maayo nga gawi sa paghatag og world class hospitality alang sa atong mga bisita sa lain lain nga dapit sa kalibutan. Magtinabangay ta aron molambo ang turismo sa Pilipinas,” dugang pa ni Frasco.M