442 ka Talisaynon nigradwar sa lain-laing kurso sa TESDA
CEBU, Philippines — Miabot sa 442 ka mga Talisaynon ang nigradwar sa nagkalain-laing kurso sa Technical Education and Skills Development Authority (TESDA) nga gidumala sa siyudad sa Talisay.
Kini maoy gipahibawo ni Talisay City mayor Gerald Anthony “Samsam” Gullas nga maoy pinasidunggang dinapit sa kalihukan.
Nalipay si Gullas nga nagtan-aw sa mga nigradwar nga nakab-ot nila ang kalampusan human sa pila ka buwan nila nga paningkamot.
Matud pa sa mayor nga daghan sa Talisaynon ang adunay talento nga napanday pinaagi sa paningkamot, hands-on experience ug lig-on nga determinasyon bisan pa sa mga hagit sa kinabuhi.
Sigon pa niya nga daghang mga oportunidad nga moabot sa mga nigradwar ug siya nipahinumdom nga dili kalimtan ang mga tawo nga nisuporta kanila.
Ang TESDA Talisay nitanyag og mga kurso sama sa housekeeping, bread and pastry production, electrical installation and maintenance, shielded metal arc welding, slaughtering, bookkeeping, emergency medical services, driving, cookery, beauty care, hilot wellness ug dressmaking.
Nanghinaot si Gullas nga gamiton sa mga graduates ang ilang nakat-onan aron ilang matabangan ang tagsa-tagsa nila ka pamilya.
Samtang sa laing bahin magpadayon nga magtungha nga libre ang mga tinun-an sa Talisay City College (TCC).
Si mayor Gerald Anthony “Samsam” Gullas nipahibawo niini human sa ilang pagbisita sa buhatan sa Unified Student Financial Assistance System (UniFAST) sa Tertiary Education.
Uban ni Gullas si Dr. Richel Bacaltos, presidenti sa TCC, Teresa Bordalba, city treasurer ug si Wendy Labajo, registrar sa TCC.
Si Bacaltos niingon nga ilang giklaro ang suway nga pag us-os sa miscellaneous fees ug ang pagpangutana sa bayronon sa first semester kay naa naman karon sila sa second semester.
Matud pa niya nga nisaad ang UniFAST nga sila mobayad ug padayon ang libre nga pag eskwela sa mga tinun-an sa TCC.
Usa ka ahensya sa gobyerno sa Pilipinas ang UniFAST pinaagi sa Commission on Higher Education (CHED) nga mo implementar sa state-funded student financial assistance program (StuFAPs).
Naghatag sila og libre nga pag eskwela sa kolehiyo nga kwalipikado nga tinun-an sa pribado ug pampubliko nga tunghaan.
Mapasalamaton si Gullas sa executive director sa UniFAST nga si Atty. Septoj Dela Cruz sa pagpaminaw sa ilang hangyo ug sa pasalig nga sila matabangan alang sa kaayohan sa mga tinun-an sa TCC. (CEBU NEWS)
- Latest
