Plano sa ASEAN para sa turismo giladlad

CEBU, Philippines — Pormal nang gilusad ang ASEAN Tourism Sectoral Plan 2026-2028 atol sa gipahigayong ASEAN Tourism Conference diin lima ka mga focus area ang gihatagan og prayoridad.

Sa panagtigom sa mga ministro sa ASEAN gituki nila ang mga isyu nga giatubang sa sektor sa turismo sa rehiyon diin gilatid ang lima ka nag-unang aspeto nga hatagan og pagtagad sa mosunod nga duha ka tuig.

Lakip ani ang Empowerment sa Tourism Workforce o Pagpalig-on sa Katakus sa mga Mamumuo, Hapsay ug Sayon nga Pagbiyahe, Sustainable Tourism o Pagdumala sa Kinaiyahan ug Kultura.

Gihatagan og gibug-aton sa mga lider ang kaimportante sa mas lawom nga kolaborasyon tali sa mga nasud nga sakop sa ASEAN aron masiguro ang hiniusang kalamboan sa rehiyon.

Sa maong tigum, gipaambit ni Tourism Secretary Christina Garcia Frasco ang kasinatian sa Pilipinas sa pag-atubang sa mga hagit, ilabi na ang nangaging mga kalamidad sama sa linog ug mga bagyo sa niaging tuig.

Gihisgutan niya ang mga estratehikong lakang nga gihimo sa nasud aron daling makabangon ug mapadayon ang kadasig sa turismo taliwala sa mga pagsulay.

Sa pikas bahin, ang Pilipinas nagtinguha og mas lawom ug lig-ong relasyon  tali sa ASEAN  ug sa Russian Federation atol sa 5th ASEAN–Russian Federation Tourism Ministers’ Meeting kagahapon.

Gihimug-atan sa tigum ang confidence-building, sustainability, people-to-people exchanges isip mga nag-unang yawe alang sa malungtarong kalamboan sa turismo sa rehiyon ug sa maong nasud.

Si Frasco nagkanayon nga ang turismo dunay dakong papel sa pagsustinir sa panginabuhian ug pagpalig-on sa pagsalig ug ang panag-kukabildo sa mga tawo nga dunay dignidad ug respeto matawag nga diplomasya.

Iyahang gipahibalo ang mga inisyatiba sa Pilipinas para niini sama sa chartered flights nga dunay direktang access sa Kalibo, gipalapdang mga kapilitang opsyon sa mga pwedeng suroyan, Russian-language training para sa mga tour guides, ug study programs nga dunay kalakbit nga pagsuroy-suroy.

Matud niya, nahasubay kini sa ASEAN–Russian Federation Tourism Work Plan para sa 2026 hangtud sa moabot pang mga katuigan nga himuong prayoridad ang sustainable tourism, digital transformation, innovation, capacity building, knowledge exchange, ug joint destination promotion.

Si Nikita Kondratyev, Director General of the Department for Multilateral Economic Cooperation and Special Projects of the Russian Federation, mipadayag sa ilang suporta para sa mas malambuong turismo tali sa ASEAN ug Russia.

Nagpasalamat siya sa Pilipinas ug nidayeg sa Timor-Leste nga nakasulod na kini isip miyembro sa ASEAN.

Gipahibalo sab niya nga 35 ka tuig na ang relasyon sa Russia ug sa ASEAN ug 50 ka tuig na sab ang diplomatikong relasyon sa Pilipinas ug sa ilang nasud. IBM BANAT NEWS