Katukoran sa Metro Cebu Expressway nagpadayon na

CEBU, Philippines — Nibisita sa Dakbayan sa Naga si Department of Public Works and Highways Secretary Vince Dizon atol sa iyang ikaduhang adlaw sa Sugbo aron personal nga susihon ug makita ang sitwasyon sa nagpadayon karon nga trabaho sa Metro Cebu Expressway.

Ang trabaho sa 56.9 kilometrong Metro Cebu Expressway nahunong kini human ang Department of Environment and Natural Resources nipagawas og cease and desist order tungod sa nakitang delikado gumikan sa mga nidahili nga parte sa dalan ug sa bungtod nga anaa sa kilid niini.

Niadtong tuig 2023 nakasinati og pagdahili sa yuta ug paghulpa sa dalan sa maong dapit ug niadtong Hulyo 2025 gikataho nga gibalik ang pagtrabaho sa maong proyekto.

Gihimo ang maong proyekto diin magsilbi kini nga backbone highway aron sa pagmenos sa biyahe gikan sa south padulong sa norte ilabi na sa Dakbayan sa Danao ug pagkunhod sa kahuot sa trapiko diha sa dalan N. Bacalso.

Ang proyekto gitunga ngadto sa upat ka segment ug ang 3A segment o unang segment nga nagagikan sa Barangay Pandan padulong sa Barangay Cantao-an nga pulos sakop sa Dakbayan sa Naga nga adunay gitas-on nga 4.5 kilometers ang gitrabaho ug maoy gisusi ni Dizon.

Gipakigkitaan ni Dizon ang opisyales sa DPWH-7, contractor sa maong proyekto ug ang bag-ong consultant sa DPWH kalabot sa rehabilitasyon.

Gituki nila ang mga gihimong intervention aron dili na subling mahitabo ang nasinating paghulpa sa yuta.

Gipaklaro usab ni Dizon sa contractor kon matuman ba ang plano nga mahuman ang unang segment karong buwan sa Hunyo.

Ang nahibilin nga tulo ka proyekto gikan sa Lungsod sa Minglanilla ngadto sa Dakayan sa Danao diin ubos na kini sa Cebu Provincial Government ug ipaagi sa public-private partnership.

Si Dizon nipadayag nga buot niyang makighinabi kang Cebu Governor Pamela Baricuatro tungod kay gusto nilang makatabang sa maong proyekto.

Ang mga pamilya nga naapektohan sa maong proyekto gipaniguro ni Dizon nga mabayaran. (BANAT NEWS)