Mag-agaw nasampak sa pickup

CEBU, Philippines — Nalandig sa tambalanan ang manag-agaw human nga misampak sa gaparking nga pickup ang ilang motorsiklo diha sa Campo 2, Barangay Jaclupan, Dakbayan sa Talisay kagahapon sa kadlawon.

Ang mag agaw mao sila si alyas Adlawan, 20 anyos ug alyas Justine, 20 anyos nga pulos nagpuyo sa mao ra sa maong dapit.Ang pick-up nga ilang nadasmagan gipanag-iya ni alyas Steph.

Sa inisyal nga pakisusi, nag angkasanay ang mag-agaw paingon sa Barangay Lagtang, apan sa pag-abot nila sa dapit nabangga sila sa maong pickup. Hinungdan nga maayong pagkapiit sa usa sa mga sakay niini. Ang angkas gidala sa tambalanan samtang drayber gidala sa buhatan sa traffic division.

Sa pikas bahin, gipangusgan sa mga sakop sa City of Talisay-Traffic Operation Development Authority (CT-TODA), Anti-Vending Task Force ug ang kapolisan sa Talisay  ang pagpatangtang sa tanang mga nakaali sa kadalanan.

Unang gihawan mao ang Mananga Bridge ngadto na sa flyover sa Barangay Tabunok.

Matud pa ni Jonathan Tumulak, pangu sa CT-TODA nga adunay miboluntaryo sa pagkuha sa ilang motor nga ilegal nga giparada daplin sa dalan samtang ang mga tag-iya sa tindahan nasab ang mikuha sa ilang kabtangan nga nilapas sa karsada.

Nagpasalamat si Tumulak ngadto sa mga mamaligyaay og buwak, tanom ug uban pa nga manindahay sa Victoria Street sa Barangay Tabunok tungod sa ilang pagkooperar.

Samtang sa ilang pagsubay sa Eskina Sombrea paingon sa Wilconcon (northbound) aduna gyud silay nadala nga mga motor nga gibilin lang daplin sa dalan ug walay nagpakita nga tag-iya.

Naa sab silay na clamp nga sakyanan nga gikan sa usa ka kawani sa Land Transportation Office (LTO) nga diha rasab sa daplin sa karsada giparada. IBM BANAT NEWS