Roble gitudlo nga professional sector representative sa MCWD

CEBU, Philippines — Gitudlo ni Mayor Nestor Archival, Sr. si Mariefel Resma Roble isip bag-ong professional sector representative sa Metropolitan Cebu Water District (MCWD) board of directors.

Si Roble usa ka lisensiyadong abogado ug engineer nga girekomenda sa Institute of Electronics Engineers of the Philippines Inc. (IECEP) ug epektibo ang iyang appointment niadtong Enero 12, 2026 ug magpadayon hangtud sa Disyembre 31, 2030 gawas kong tangtangon o tungod kay siya mismo nikanaog sa iyang posisyon.

Isip usa ka aktibong miyembro sa IECEP aduna kini maayo nga record ug dili empleyado sa gobiyerno ug dili sakop sa one-year election ban.

Ang pagkatudlo kang Roble subay sa deklarasyon sa Local Water Utilities Administration (LWUA) niadtong Nobiyembre 4, 2025 diin bakante ang posisyon sa professional sector sa MCWD board.

Niadtong Disyembre 3, 2025 nagpadala og suwat si Archival ngadto sa MCWD nga sugdan na ang nominasyon sa maong posisyon subay sa Presidential Decree 198.

Apan matud ni Archival nga wala gihapon molihok ang MCWD bisan pa sa follow-up letter nga iyang gipadala niadtong Disyembre 3, 2025 hinungdan nga napugos ang kagamhanan sa paghimo og direktang appointment aron masiguro ang pagsunod sa balaod ug ang padayon nga operasyon sa serbisyo sa tubig sa siyudad.

Si Roble ang nipuli kang Atty. John Rey Saavedra nga kaniadto naglingkod isip professional sector representative sa MCWD board. BDB BANAT NEWS