Lapu-Lapu istriktong nipatuman sa solid waste segregation

CEBU, Philippines — Gihingusgan sa kagamhanan sa Dakbayan sa Lapu-Lapu ang pagpatuman sa solid waste segregation policy human sa kalit nga inspection nga gihimo sa City Environment and Natural Resources Office (CENRO).

Niadtong Huwebes, Enero 23, 2026 nibisita ang mga personnel sa CENRO diha sa mga buhatan sa city hall aron susihon ang pagsunod sa regulasyon nga nagkinahanglan og duha ka basurahan matag buhatan diin usa alang sa biodegradable o malata nga basura ug ang laing usa alang sa non-biodegradable o di-malata nga mga materiyales.

Base sa polisiya nga ang non-biodegradable nga basura sama sa plastik ang kolektahon sa garbage truck. Samtang ang biodegradable nga basura lakip ang ginunting nga papel ug panit sa prutas iproseso alang sa composting ug i-turnover ngadto sa community garden nga gidumala sa CENRO diha sa sports complex.

Gisugo ni Mayor Cindi King-Chan ang CENRO nga pahinumduman ang mga hepe sa mga buhatan ug empleyado nga istrikto nga sundon ang mga patakaran sa kalimpiyo sa siyudad ug nipahimangno nga mahimong hatagan og citation ticket ang mga molapas subay sa City Ordinance No. 484-97. Niadtong Enero 22, 2026 nagpahigayon usab ang CENRO og seminar sa hustong paglabay sa basura alang sa mga tindero sa Lapu-Lapu City Public Market isip kabahin sa gipakusog nga kampaniya sa siyudad sa solid waste management.

Nitambong sa maong briefing ang mga tindero ug gagmay’ng negosyante diin gipahibalo sila sa hustong pamaagi sa pagdumala sa basura ug sa mga silot alang sa dili pagsunod sa regulasyon.

Gipangulohan ang kalihokan ni CENRO head Jocelyn Abayan kauban sila si city councilors Rufo Bering ug Climaco Tatoy sa koordinasyon sa Solid Waste Management Office ug sa mga miyembro sa clearing team sa siyudad.

Si Bering, chairman sa city council committee on environment, natural resources, ug climate change adaptation nituki sa implementasyon sa Purok-Based Solid Waste Management System Ordinance atol sa seminar.

Samtang, gipakita sa mga empleyado sa city government ang ilang pagsunod atol sa inspection niadtong Huwebes pinaagi sa pagbutang og klarong label sa mga basurahan sa ilang tagsa-tagsa ka buhatan nga gilahi ang malata ug di-malata nga basura.

Matud sa kagamhanan sa siyudad nga ang mga inspection ug information drive kabahin sa padayon nga paningkamot sa siyudad sa pagpalig-on sa hustong pagdumala sa basura diha sa mga buhatan sa gobiyerno ug sa mga publikong lugar. — /BDB (BANAT NEWS)