Duha ka HVI sikop sa buy-bust
CEBU, Philippines — Nadakpan atol sa buy-bust operation sa mga operatiba sa Provincial Intelligence Unit/Provincial Drug Enforcement Unit Bohol Police Provincial Office(BPPO) ang duha ka suspetsadong high value individual diha sa Purok 3 Barangay Canapnapan, Lungsod sa Corella, Probinsiya sa Bohol niadtong Sabado sa hapon, Enero 24, 2026.
Ang mga nadakpan mao sila si Denoberto Fuentes, 33-anyos, mag-uuma, taga Purok 7, Barangay San Vicente, Lungsod sa Trinidad, Bohol ug Jerome Polestico, 35- anyos, residente sa Purok 8, Barangay San Agustin, Lungsod sa Talibon, Bohol.
Nasakmit sa mga operatiba ang 75.6 gramo nga shabu nga nikantidad ngadto P514,080 ug ubang non-drug items sama sa cellular phone, buy-bust money, belt bag nga color itom nga nagsilbing container sa nasakmit nga shabu, usa ka motorsiklo nga kolor itom.
Gawas niini, nakuhaan usab ang mga suspetsado og kalibre .45 nga pistola nga adunay magazine ug tulo ka buhing bala.
Nasayran nga si Fuentes nadakpan na niadtong 2014 sa kasong double murder ug frustrated murder ngadto sa Trinidad, Bohol ug nakagawas niadtong tuig 2024 human makaserbisyo og napulo ka tuig ngadto sa Bilibid prison.
Samtang si Polestico nadakpan ngadto sa General Trias, Cavite sa kasong kalapasan sa Section 5 ug 11, Article II sa Akta Republika 9165 kun “Comprehensive Dangerous Drugs Act 2002” niadtong 2020 ug nakagawas niadtong 2025 human sa upat ka tuig nga serbisyo niini sa prisohan.
Dugang ni Fuentes nga nagpabiling sa illegal drug activities ug giingong gun man kon dunay mga down lines sa drug transaction ang mapakyas sa pag-remit. — /BDB (BANAT NEWS)
- Latest
