Impeachment cases makaapekto sa imahen sa nasud —Ejercito

CEBU, Philippines — Posibleng maapektuhan ang imahe ug kalig-on sa politika sa Pilipinas kung madayon ang impeachment complaints batok kang President Ferdinand “Bongbong” Marcos Jr. ug Vice President Sara Duterte, matud ni Senador JV Ejercito.

Sumala sa senador nga ang posibilidad nga magkadungan ang impeachment cases batok sa duha ka top officials makahatag og impresyon sa gawas nga ang Pilipinas nag-atubang og political instability, ug mahimong “dili maayong hulagway” sa international community. Bisan pa man, giila ni Ejercito nga ang Senado adunay konstitusyonal nga katungdanan sa pagdungog sa mga impeachment complaints kung kini ihatud gikan sa House of Representatives, apan nagpabilin ang iyang kabalaka sa mas dako nga epekto niini sa nasod.

Ang uwahing impeachment complaint batok kang Presidente Marcos gisang-at niadtong Enero 19, 2026 ni Atty. Andre De Jesus.

Ang reklamo naglangkob sa alegasyon nga betrayal of public trust, constitutional violations, ug uban pang mga akusasyon.

Sa laing bahin, aduna usab mga nakalabay nga impeachment complaints batok kang Bise Presidente Sara Duterte, nga unang gi-file sa House of Representatives. Apan ang mga articles of impeachment batok kaniya gi-archive sa Senado human nga giingong barred sa Supreme Court ang kaso tungod sa one-year rule sa konstitusyon.

Ang one-year rule nagpasabot nga dili na makasang-at og laing impeachment complaint batok sa usa ka opisyal sulod sa usa ka tuig human ang una nga complaint gi-archive o gi-dismiss, ug kini ang rason nga nawala ang unang impeachment attempt batok kang Duterte. (BANAT NEWS)