Drug den gironda, tulo nadakpan
CEBU, Philippines — Gironda sa mga sakop sa Philippine Drug Enforcement Agency (PDEA) Region 7 ang usa ka drug den ug gidakop ang usa ka high-value target ug duha niini ka mga bisita atol sa buy-bust operation diha sa Sitio Panagdait, Barangay Ermita, Cebu City kagahapon, Enero 22.
Nasakmit sa mga otoridad ang 11 grams nga gidudahang shabu nga balor P22,000 uban sa marked money, cash na gituohang halin sa ilegal nga drugas ug mga drug paraphernalia.
Ang mga nadakpan giila nga silang Romeo Cuizon Dalogdog Jr. alias “Jun2x,” nga giingong maoy nagpadagan sa maong drug den ug duha ka mga bisita niini nga silang Roger Jañola Ampo ug Ceejay Mendoza Fernandez.
Samtang na-rescue sa kapulisan sa Mabolo Police Station 4 Cebu City Police Office(CCPO) ang usa ka 15-anyos nga lalake atol sa ilahang buy-bust operation sa Sitio Negative, Barangay Carreta, siyudad sa Sugbo niadtong Miyerkules sa gabii, Enero 21, 2026.
Bisan 15-anyos pa kini gikonsiderar na siya nga usa ka high value individual sa drug trade sa lugar.
Nakuha sa kapolisan ang 15 grams nga shabu nga nagkantidad og kapin sa P100,000. Gikatahong makabaligya kini og 10 ngadto sa 25 gramo nga shabu kada semana.
Ang tinubdan matod pa sa illegal nga drugas niini kay usa ka ginganlan og Vince nga taga Ponce Dos.
Samtang sa Talisay City, sa prisohan ang napaingnan sa usa ka 40 anyos nga babayeng gipasanginlang tigpayuhot og ilegal nga drugas sa sitio Rattan, Barangay Tanke niadtong Miyerkules sa tungang gabii.
Si alyas Titang dugay nga gipanid-an sa kapolisan ug anang gabhiuna, gipalitan siya og shabu hinungdan nga nadakpan kini.
Nakuha gikan kaniya ang shabu nga nitimbang og 5.1 gramos.— Romeo Limpangog, Gabriel Bonjoc (BANAT NEWS)
- Latest
