Masuso giabandonar

CEBU, Philippines — Usa ka masuso nga babaye nga bag-o lang gihimugso ang gibilin daplin sa Gotianoy Street sa Barangay Kamputhaw ning Dakbayan sa Sugbo nga gisulod sa plastic bag ug dayon gisulod sa karton.

Ang maong masuso  nihilak pa kini sa dihang gikuha sa pulis gikan sa karton sa plastic bag. Gitabang kini sa pulis ug sa mga tawo sa dapit diin dali nga giputos sa tuwalya ug dayon gidala sa labing duol nga tambalanan.

Matud pa ni Police Col. George Ylannan, pangulo sa Cebu City Police Office, sa pagka karon giuna usa nila ang medical care sa masuso sa tambalanan.

Nagpahigayon na sila karon og imbestigasyon aron masayran kung kinsa ang naglabay sa maong bata alang sa posibleng pagpasaka og kaso.

Si Mayor Nestor Archival sa Dakbayan sa Sugbo, natandog sa gidangatan sa masuso ilabi na nga bag-ohay pa nagsaulog sa pista sa Balaang Bata Senyor Sto. Niño ang dakbayan.

Giawhag niya ang mga ginikanan o inahan nga pwede silang modangop sa iyaha sa higayon nga makasinati sila og kalisdanan ug kabug-at sa ilang kinabuhi ilabi na kung maglambigit kini sa ilang mga gagmay nga mga anak.

Ang mayor nipadayag nga dili angay ilabay ang mga bata kay luoy ug wala silas mga sala.

Apan pipila sa mga tawo sa maong dapit ang nibutyag nga naa sa tambalanan ang inahan sa maong gilabay nga masuso. Wala pay kumpletong impormasyon ang kapolisan kun tinuod ba kini. IBM BANAT NEWS