Aloguinsan nitanyag sa Mandaue sa paglabay og basura

CEBU, Philippines — Gitanyag karon sa kagamhanan sa Lungsod sa Aloguinsan ngadto sa kagmhanan sa Dakbayan sa Mandaue ang paglabay niini sa mga basura ngadto sa ilang dapit niining mga panahona.

Niluwat sa maong tanyag ang opisyales sa maong lungsod nga gipangulohan ni Mayor Ceasar Iganasio Moreno sa ilang pagbisita sa buhatan ni Mayor Thadeo  Jovito “Jonkie”  Ouano sa niaging adlaw.

Si Ouano nagkanayon nga subli nilang tan-awon ang maong kahigayonan gumikan kay temporaryo ang paglabay sa mga basura  karong panahona ngadto sa Green Learning Park sa Barangay Umapad sa maong siyudad.

Ang siyudad padayon pa sa pagpangita og alternatibong lugar nga himuong  garbage disposal nga  pro-people ug pro-environment.

Si Konsehal Pontico  Carlo  Fortuna nagkanayon nga sa ilang regular session sa konseho  sa sunod  semana ilang patambongon ang operator  sa nahugno nga Binaliw Landfill.  Matud ni Fortuna nga tinguha nilang masayran kon hangtud kanos-a ang ilang pagsirado sa Binaliw Landfill aron makapangita usab ang kagamhanan sa Siyudad sa Mandaue og permamenting lugar nga kalabayan sa mga basura. BDB BANAT NEWS