Sud-gawas sa prisohan gidul-it og pusil sa ulo
CEBU, Philippines — Patay ang usa ka 49-anyos nga lalaki human siya gipusil sa wala pa mailhing mamumuno diha sa Upper Lawaan 1, Dakbayan sa Talisay niadtong Domingo sa gabii, Enero 19.
Ang biktima mao si alyas Patok, 49 anyos nga nagpuyo sa maong lugar.
Si Police Lt. Col. Homobuno Sayon, hepe sa kapolisan sa Talisay nibutyag nga nagduwa sa internet cafe ang biktima.
Kalit lang nga nisulod ang usa ka wa mailhing mamumuno nga nakasul-ob og facemask, itom nga helmet, itom nga shorts ug itom nga T-shirt.
Way daghang estorya gipusil sa maong tawo ang ulo sa biktima kaduha ka higayon. Nakadagan pa ang biktima og 100 metros apan nahagba kini.
Gisuwayan siya og tabang sa mga tawo apan wala gihapon kini matabang.
Ang kapolisan nakarekuber og usa ka bala, duha ka kabhang, laing kagar nga bala ug usa ka deformed lead ang nakuha sa crime scene. Si Sayon niingon nga kaduha na kahigayon nga nabilanggo ang biktima gumikan sa kasong pagpangawat ug pagdala og walay lisensya nga armas.
Asoy pa ni Sayon nga adunay usa ka person of interest nga ilang gisundan pero dili pa sila makabutyag sa motibo sa krimen. Padayon ang kapolisan sa pag imbistigar sa panghitabo. (BANAT NEWS)
- Latest
