Dul-an 2 milyones niprosisyon

CEBU, Philippines — Gibanabanang moabot dul-an duha ka milyong deboto ang niduyog sa Solemn Procession sa Senyor Sto. Niño kagahapon sa hapon, Enero 18,2026.

Bisan sa kadaghan sa mga nanguyog ug kataas sa rota nga 5.5 kilometros, giingon sa kaparian sa nga mas sayo karon nga nabalik ang Balaan nga Bata sa Basilica Minore del Sto. Niño.

Si Konsehal Dave Tumulak ang pangulo sa Cebu City Disaster Risk Reduction sa konseho nagkanayon nga  mas taas gani karong tuiga ang rota kung ikomparar sa nilabay nga tuig nga aduna lang 1.4 milyon nga niapil , apan karon niabot ngadto sa 1.9 milyon.

Ang Balaang Bata nabalik sa basilica sulod lang sa usa ka oras ug tunga sa gikatakda niini nga Santos nga Misa sa alas singko y media sa hapon.

Ang nangulo sa Santos nga misa ang Archbishop Emeritus sa Archdiocese of Cebu Archbishop Jose Palma uban sa mga kaparian sa Sugbo ug gikan sa mga lain nga dapit.

Ang arsobispo sa iyang homily sa ika-461th Fiesta Señor mapasalamaton sa kahigayonan nga makaselebrar sa Santos nga Misa uban sa mga kaparian sa Archdiocese pag-usab atol ning maong kasaulogan.

Dugang pa niini bisan sa kadaghan kabalaka sa bagyong Ada apan maayo gayud ang Ginoo ug mahigugmaon ang Balaan nga Bata tungod sa maayong lakat sa panahon gikan sa Fluvial, Penitential Walk ngadto na sa Santos Misa tungod sa maayong lakat sa panahon nga gihatag.

Ang arsobispo nipadayag nga angayan gayud pasalamatan ang Balaan nga Bata nga matud pa niya bato balani sa gugma tungod sa daghan mga kaayohan nga gihatag niini.

Si Palma,nipadayag bisan sa kalamidad padayon lang gihapon sa pagtuo nga ang Ginoo puno sa gugma dili kini mobuhi ug mobiya                  kanato.

Ang arsobispo atol sa iyang homiliya nipahilom sa makadiyot sa mga nanimba aron sa paghalad ug pag- ampo para sa mga biktima sa katalagman sama sa Linog, Bagyong Tino ug sa Binaliw Trashslide.

Samtang si Mayor Nestor Archival nipadayag nga malinawon ug malampuson ang tanan kalihukan sa bisperas sa Fiesta sa Balaan nga Bata gikan sa Fluvial ngadto na sa Pontifical Mass diin bagang duot sa mga magtutuo ang niapil sa maong kalihukan.

Ang kapulisan nagpadala og kapin sa 1,000 ka mga pulis ug mga 10,000 ka volunteers aron magbantay sa rota.

Adunay mga report nga pipila ka deboto ang nalipong ug gihatagan dayon og medikal nga atensyon sa mga medical team nga naka-standby sa kilid sa ruta.— Rowena D. Capistrano ug Shiela Mae Agrabio/IBM

Fuvial malinawon

Gihulagway sa Philippine Coast Guard (PCG)-7 nga hapsay ug malinawon ang gipahigayong fluvial procession subay na sa 461st Fiesta Señor kagahapon, Sabado, Enero 17, 2026.

Ang fluvial procession nagsugod pasado alas-6 sa buntag diin ang MV Lite Ferry 10 nga iya sa Lite Shipping maoy nagsilbing galleon nga gisakyan sa mga imahen gikan sa NAVFORCEN sa Lapu-Lapu City pabalik sa Pier Uno sa Cebu City.

Gisakay ang Sagrada Pamilya nga mao ang imahe sa Balaang Bata Senyor Sto. Niño, Birhen sa Guadalupe ug St. Joseph nisubay sa Mactan Channel ug niliko ilawom sa Cebu-Cordova Link Expressway.

Si Coast Guard Station Central Cebu Commander Jerome Lozada miingon walay mga untoward incidents nga natala sa pagpahigayon sa fluvial procession nga gikuyogan og 420 ka mga sakyanan sa dagat. 

Luwas ra hinuon ang tanan nga nahuman ang prosisyon.

Apan daghang mga deboto ang dismayado ilabi na kadtong mga nagpaabot og pipila ka oras diha sa Mandaue-Mactan Bridge sa pagtuong moagi kini sa maong dapit.

Ang Philippine Coast Guard sa Central Visayas (PCG-7) nangayo hinuon og pasaylo bahin ani ug miingon nga a sunod palapdan na nila ang pahibalo bahin sa rota sa fluvial procession.

Apan ilang gipasabot nga  wala nila giapil sa rota ang pagsuong sa maong taytayan karon tungod sa kahagip-ot sa agianan para sa mga dagkong barko nga partisipante ug delikado kini para sa tanan.

"I don't know where's the source of the information nga moagi ang galleon didto, but I realized on a moving forward maybe we should properly announce and include in our announcements yung mismong official route ng galleon for the devotees to know kung asa gyud moagi                      ang galleon," ni Lozada pa.

Alas- 8 sa buntag nidunggo ang galleon Pier ug nakuha ra sa PCG ang target nga travel time. (BANAT NEWS)