Liquor ban karong adlawa

CEBU, Philippines — Gipatuman ang liquor ban sa Dakbayan sa Sugbo sugod karong adlawa ug kini ipatuman sulod sa 300 metros gikan sa  opisyal nga rota sa Sinulog Grand Parade ug duol sa Cebu City Sports Center kun diin ipahigayon ang mga kalihokan sa Sinulog Grand Showdown.

Gipatuman ang maong lakang aron masiguro ang kaluwasan, kahapsay, ug kalinaw atol sa kasaulogan.

Sumala sa advisory sa Business Permit and Licensing Office (BPLO) nga gipagawas niadtong Enero 15, 2026, ang maong liquor ban subay sa Executive Order No. 051-2025 ug Executive Order No. 053-2026 gikan sa buhatan ni Mayor Nestor Archival.

Ubos sa maong mando, hugot nga gidili ang pagpalit, pagbaligya, pag-apod-apod, pagpanag-iya, ug publikong pag-inom sa ilimnong makahubog.

Epektibo ang temporaryo nga liquor ban sa alas 6:00 sa buntag hangtud sa alas 8:00 sa gabii sa Enero 17 ug Enero 18.

Ang mga indibidwal ug mga establisemento nga makit-an nga nakalapas sa mando mahimong silotan ubos sa Executive Order No. 053, lakip ang multa, pagsuspinde o pagbawi sa business permit, ug uban pang silot.

Adunay posibilidad nga ang silot nga ipatuman mosangpot ngadto sa administratibo o kriminal nga kaso.

Gimandoan sa BPLO ang tanang tag-iya sa negosyo ug mga vendor nga hugot nga motuman sa advisory ug siguroon nga ang ilang mga empleyado husto nga napahibalo.

Giawhag usab sa mga opisyal sa dakbayan ang mga apektadong partido nga direktang makigkoordinar sa Business Permit and Licensing Office alang sa dugang nga klaripikasyon.

"Paggawas aning EO ang City Government nagpadala na og kopya aning EO didto sa mga affected nga mga establishments within the 300 meter radius gitagaan na sila og kopya ani, so meaning since nakadawat naman sila og kopya gipabalikan pa gyud nako didto sa Station Commander, gipabalikan, gipabandilyo ug gi-inform ang mga establishments with regards ani nga EO," sigon sab ni Police Colonel George Ylanan, Officer-in-Charge sa Cebu City Police Office.

Kun pananglitan dunay masakpan kompiskahon nila ang mga ilimnong makahubog ug idokumento aron iduso ngadto sa BPLO alang na sa ipahamtang nga silot.

Ang mga establisimentong wala masulod sa 300 meter radius mahimong makapamaligya ug mag-inom og ilimnong makahubog. IBM BANAT NEWS