Fluvial procession, panahon ang agdon

CEBU, Philippines — Tungod sa duha ka adlaw nga sagunsong pagsige og uwan atol sa Traslación sa 461st Fiesta Señor, ang Basilica Minore del Santo Niño de Cebu nangandam sa posibleng pagkanselar sa usa sa mga simboliko ug gipaabot nga kalihokan sa kapistahan nga mao ang fluvial procession.

Si Fr. Jules Van Almerez, media liaison officer sa Basilica sa interbyu sa The Freeman/Banat News nga pabiling lig-on ug madasigon ang mga deboto bisan paman sa pagsige og uwan. Ang fluvial procession usa na ka tradisyon sa Pista Senyor nga pagabuhaton Sabado bisperas sa kapistahan diin i-reenact ang pag-abot sa Imahen sa Senyor Sto. Niño sa Cebu City nga mao sab ang unang higayon sa kasaysayan nga niabot dinhi sa nasud ang Kristiyanismo.

Gikan sa Nuestra Señora de Regla Parish National Shrine sa Lapu-Lapu City isakay sa official galleon nga Lite Ferries 10 ang imahen nga kuyogan og gatosan ka mga nagkalain-laing sakyanan sa dagat patabok sa Mactan Channel pabalik sa Pier 1 sa Cebu City dayun sugaton kini sa mga tawo ug ibalik sa Basilica. “If ever lang gyud na muulan, which we are praying nga dili lang gyud unta no, we will be forced to go on a motorcade na lang instead of a fluvial procession,” matud pang Fr.Almerez.

Apan tungod aning dautang panahon, ang mga organizers nangandam sa posibilidad nga i-motorkada nalang ang imahen pabalik sa Cebu City agi sa CCLEX.

Sumala pa sa localized forecast nga gipagawas ni  Cebu City resident meteorologist Engr.Oscar Tabada, ang Cebu City makasinati og mga pag-ulan karong buntag uban sa mapanganurong kalangitan sa hapon ug dunay 30% nga kahigayonang moulan.

Samtang walay nakitang dagkong peligro, ang Philippine Coast Guard nanagana sab daan alang sa kaluwasan sa tanan. IBM BANAT NEWS