Devotee City giablihan na

CEBU, Philippines — Giablihan na sa kagamhanan sa Dakbayan sa Sugbo ang Devotee City nga nakaplastar sa dalan A. Pigafetta sa atubangan sa Cebu Central Post Office alang sa Sinulog 2026.

Karong tuiga, 30 ka mga container vans ang gibutang gikan sa Cokaliong Shipping Lines nga mamahimong  libre nga kapahilunaan ug maka-akomodar sa 900 to 1,000 ka mga deboto gikan sa laing dapit ug mianhi dinhi sa syudad aron nga mosaulog sa ika-461 Fiesta Señor.

Naghatag sab kini og libre nga batakang serbisyo lakip na ang pagkaon ug tubig gikan sa pribadong sektor ug sa kagamhanan sa Probinsya sa Sugbo ug kumon nga kasilyas nga mamahimong mapahimuslan sa mga deboto.

Gipahimangnuan ang mga deboto nga mopuyo nga magdala og hygiene kits.

Ang mamahimong makapuyo gikinahanglan nga magpakita og ticket sa bus o sa barko nga nagpamatuod nga sila mibyahe gikan sa gawas sa syudad.

Ang buhatan ni Konsehal Francis Esparis maoy nagdumala sa kinatibuk-ang koordinasyon lakip na ang Department of Social Welfare and Services (DSWS), Cebu City Disaster Risk Reduction and Management Office (CCDRRMO), Cebu City Transportation Office (CCTO), Department of Public Services (DPS), Department of General Services (DGS), Management Information and Computer Services (MICS), ug City Health Department (CHD) aron sa pagmentinar 24/7 nga operasyon aron nga magpabilin nga hapsay ug malinawon ang pag-istar sa mga deboto

Ang Devotee City sa syudad namugna pinaagi sa inisyatiba ni anhing konsehal Fe Mantua Ruiz niadtong 1996 kun diin una kini nga gitawag nga “Tent City” nga maoy temporaryo nga kapasilungan sa mga dayo nga deboto nga walay igo nga ikabayad sa mga hotels o pension houses panahon sa Sinulog.

Sulod sa hapit tulo ka dekada, ang Devotee City gitukod sa nagkadaiyang lugar apan duol lang kini sa Basilica Minore del Santo Niño aron nga dili na mogasto pa og pamelite ang mga deboto.  IBM BANAT NEWS