Way klase ug way biyahe

CEBU, Philippines — Pipila sa mga lungsod ug siyudad sa Probinsiya sa Sugbo ang nagkanselar og klase kagahapong adlawa tungod sa hulga sa bagyong Ada.

Apil sa nagkanselar sa in-person classes mao ang lungsod sa San Remigio, Bantayan, Catmon, Sogod, Tabuelan, Compostela, Tabogon, Bogo City, Cordova, Medellin, Daanbantayan, ug Carmen.

Gawas sa kanselasyon sa klase, suspendido pud ang byahe sa mga barko gikan ug padulong sa Sugbo. Apil na niini ang byahe padulong ug gikan sa Santa Fe, Bantayan Island.

Kanselado pud ang biyahe padulong sa Ormoc, Palompon, Maasin/Surigao, Getafe Bohol, Consuelo, Isabel Leyte, Kawit Medellin, Hilongos, Baybay ug Surigao gikan sa Sugbo sumala sa Cebu Port Authority (CPA).

Wala may direkta nga epekto sa Sugbo ang bagyong Ada base sa forecast sa PAG-ASA, apan ang nagdala kinin og ulan sa pipila ka bahin sa lalawigan.

Sa lungsod sa Asturias, nisaka ang tubig sa Guinabasan River hinungdan nga giabisohan sa LGU ang mga residente duol sa sapa nga mobakwit na dayon kun kinahanglan.

Ang Probinsiya sa Sugbo pinaagi sa Cebu People's Action Center (CPAC) nag-andam na daan namutos ug 1,500 food packs sa warehouse sa kapitolyo  ihatod sa lungsod sa Pinamungajan.

Lusaran

Sa Cebu City, nabalaka ang mga residente sa Barangay Lusaran sa bukirang bahin sa Dakbayan sa Sugbo human nga misaka ang lebel sa tubig sa sapa kagahapon, Enero 16, 2026 tungod sa Bagyong Ada.

Sa mikatap nga video sa Facebook, nisaka ang lebel sa tubig sa tulo ngadto sa lima ang gitas-on tungod sa pag-uwan-uwan.

Sa pagpakighinabi kang Konsehal David “Dave” Tumulak kini mibutyag nga gipabakwit ng daan ang mga residente sa barangay gym.

Base sa taho sa Barangay Secretary nga si Charlie Bacayo, 10 ka pamilya ang mihiklin sa barangay gym tungod sa trauma nga gihatag sa Bagyong Tino apan sa dihang nituang ang uwan, namauli ra sab sila  sa ilang mga panimalay.

Padayon sab nakatutok  Lusaran Base Responders sa maong dapit tungod sa kalit nga pag-uwan-uwan sa amihanang bahin sa Sugbo.  IBM BANAT NEWS