Duha patay sa kuryente

CEBU, Philippines — Duha  ang patay samtang upat ang nangaangol human aksidente silang nakuryentihan samtang nag-instalar og solar street light post sa Nivel Hills, Barangay Lahug, siyudad sa Sugbo niadtong Miyerkules sa gabii, Enero 14, 2026.

Dead on arrival sa tambalanan ang managkabanay nga sila si Limbert Lucero, 32, construction worker, taga Barangay Basak, Lungsod sa Catmon ug Juliven Lucero, 23, construction worker sab.

Samtang luwas na ang kahimtang sa mga naapil og kakuryentihan nga sila si Regan Angga Viagedor, 27; Sylvester Dinoy Pontejon, 27; Jayson Ordeñiza Montañwz, 32; pulos mga construction workers ug ang backhoe operator nga si Christian Guiwanon, 30.

Sa impormasyon aa Mabolo Police Station 4 Cebu City Police Office nakadawat sila og tawag labot sa mga tawong nakuryentihan sa naasoy nga dapit.

Pag-abot nila sa lugar  wala na diha ang mga biktima  kay gidala na sa mga sakop sa Cebu City Disaster Risk Reduction and Management Office ug Busay PTV sa Cebu City Medical Center ug Perpetual Succour Hospital.

Sa inisyal nila nga imbestigasyon subay sa impormasyong gibutyag ni Dindo Antecristo Purisima, 36, driver sa Kimwa Construction ug taga Luray II, Toledo City nga nag-install sila og solar street light sa lugar.

Samtang nag-ayo sa poste, padayon nila kining gituyok-tuyok aron masiguro nga masibo  sa concrete base nga gi-instalar ng daan sa karsada para sa poste.

Samtang na-busy og adjust wala sila makabantay nga ang metal solar post naigo sa primary line sa Visayan Electric nga miresulta nga sila nangakuryentihan. IBM  BANAT NEWS