Pipila ka dalan sa Cebu City siradohan

CEBU, Philippines — Temporaryo nga siradohan ang pipila ka mga dalan sa Dakbayan sa Sugbo karong Sabado, Enero 17, 2026 alang sa pagpahigayon sa solemn foot procession.

Gipahibalo sa Cebu City Transportation Office nga aron masiguro ang kaluwasan ug hapsay nga paglihok sa mga deboto ug mga partisipante sa dakong relihiyosong kalihokan, sugdan ang pagsira sa pipila ka mga dalan sa alas 10:00 sa buntag tungod kay sa alas 12:00 sa udto ang assembly time sa mga mouban nga mga deboto sa prosisyon.

Sugdan ang solemn foot procession sa ala 1:00 sa hapon nga manukad sa Basilica Minore del Santo Niño, padulong sa Osmeña Boulevard, moliko paingon sa D. Jakosalem Street, moliko sa Magallanes Street, padayon sa Borromeo Street, Leon Kilat Street ug mopaingon sa wala paingon sa N. Bacalso Avenue, dayon mopaingon sa V. Rama Avenue, ug moliko sa tuo sa B. Rodriguez Street ug paingon sa Fuente Osmeña Circle, ug moliko balik sa Osmeña Boulevard agi sa mga designated nga nakakonektar nga mga dalan aron nga mobalik sa  Basilica.

Ang mga dalan nga siradohan mao ang Lapu-Lapu Street, P. Burgos Sreet., D. Jakosalem Street, F. Gonzales Street, Plaridel Street, Mananalili Street, V. Gullas Street, Colon Street, Sanciangko Street, J. Alcantara Street, P. Del Rosario Street, Magallanes Street, R. Landon Street, Uytengsu Street, V. Urgello Street, Visitacion Street, Arlington Pond Street, ug C. Rodriguez Street.

Gipahimangnoan ang mga motorista nga mag-agi sa alternatibong rota ug gilaoman ang kahuot sa dagan sa trapiko sa mga apektadong dalan nga siradohan.

Gipasalig sa CCTO nga adunay mga traffic personnel nga ipakatap sa tibuok rota sa prosisyon ug sa mga major intersection aron modumala sa dagan sa trapiko ilabi na sa mga dalan nga pangsirad-an

Gipahinumduman usab ang publiko nga tumanon ang mga mando sa traffic enforcers ug ang tanang traffic signs ug gikinahanglan usab niini ang kooperasyon sa tanan sa pagtabang nga mamentinar ang kaluwasan ug kahapsay sa mga dalan atol sa pagpahigayon sa prosisyon alang sa kapistahan ni Señor Santo Niño. BDB BANAT NEWS