Liboan ka magtutuo niapil sa Walk with Mary
CEBU, Philippines — Liboan ka magtutuo ang niapil sa gipahigayon nga Walk with Mary ug nitambong sa Santos nga Misa hangtud sa traslacion kaghapon sa buntag.
Ang penitential Walk with Mary gisugdan diha sa Our Lady of Guadalupe ngadto na sa Fuente Osmeña hangtud sa Basilica Minore del Santo Niño sa alas 4:00 sa kadlawon kagahapon.
Human sa prosisyon gisunod ang Santos nga Misa nga gidumala ni Padre Joselito Danao, team moderator sa Team of Pastor sa Archdiocesan Shrine of Our Lady of Guadalupe uban sa mga kaparian sa Archdiocese of Cebu.
Ang main presider atol sa homiliya nagkanayon nga walay rason kong magsige ka og simba unya wala kay tinguha nga mahilangit.
Gipadayag ni Danao nga putlon sa katawhan ang iyang koneksiyon sa Ginoo pinaagi sa pagpakasala apan tungod kay ang Ginoo gugma kanunay kini nga mopasaylo sa mga tawo.
Human sa Santos nga Misa gisunod usab ang traslacion.
Ang mga opisyales sa kaparian ug LGU sa Mandaue ang nidawat sa imahen ni Señor Santo Niño ug Birhen sa Guadalupe gikan sa opisyales sa Dakbayan sa Sugbo ug kaparian sa Basilica Minore del Santo Niño.
Atol sa traslacion nagtagbo sa utlanan sa Cebu City ug Mandaue City ang Banay nga si San Jose, Our Lady of Guadalupe ug Santo Niño.
Atol sa pag-abot sa Mandaue gipahigayon usab ang welcome mass ug ang pag-estar niini sulod sa usa ka gabii diha sa National Shrine of St. Joseph diin karong buntag ang maong banay dalhon na usab kini sa Nuestra Senora de Regla Parish Lapu-Lapu City ug moestar og usa ka gabii sa dili pa ang fluvial niini sa adlaw nga Sabado ug mobalik kini sa Siyudad sa Sugbo agi sa kadagatan. BDB BANAT NEWS
- Latest















