State of calamity

CEBU, Philippines — Gideklarar sa konseho sa Dakbayan sa Sugbo nga ipaubos ang syudad ngadto sa state of calamity human sa makamatay nga insidente nga pagdahili sa basura sa Binaliw Landfill.

Ang anunsyo gihimo ni Konsehal David “Dave” Tumulak atol sa online nga sesyon kagahapon, Enero 13, 2026 kun diin subay kini sa rekomendasyon sa Cebu City Disaster Risk Reduction and Management Office (CCDRRMO) nga nakaapekto pag-ayo sa kaluwasan sa mga molupyo ug sa operasyon sa paglabay sa basura sa siyudad.

Sa maong resolusyon, giaprobahan sa konseho ang pagpagawas og P30 milyones gikan sa Quick Response Fund (QRF) sa siyudad aron matubag dayon ang mga nag-unang panginahanglan.

Kini sama sa naapektuhang garbage disposal services human nga nipagawas og Cease-and-Desist Order ang Department of Environment and Natural Resources aron nga sirad-an ang Prime Integrated Waste Solutions, Inc.

Sumala pa sa resolusyon, ang paggamit sa pundo ipatuman subay sa Republic Act 10121 o ang Philippine Disaster Risk Reduction and Management Act nga nagtugot sa mas paspas nga procurement, koordinasyon, ug pagtubag sa gobyerno atol sa mga kalamidad ug emerhensiya.

Sa laing bahin, naaprubahan sab sa konseho ang corollary motion ni Konsehal Pastor “Jun” Alcover Jr. nga ideklara ang Enero 16 nga “Day of Mourning” aron handumon ug matinahuron nga ilhon sa trahedya nga miigo sa Barangay Binaliw.

Sa pagkakaron 13 na ka mga patay’ng lawas ang nakuha gikan sa natumpag nga pasilidad nga natabunan sa nidahiling basura, 18 ang nalandig sa tambalanan ug 23 ang nagpabiling missing.

Sa maong adlaw magpahigayon og Santos nga Misa sa Barangay Binaliw Gymnasium nga pangulohan  sa siyudad. Sa laing bahin, usa ka ginang nga kabanay sa usa sa mga na-missing ang nakahinabi sa mga tigbalita, miangkon nga kapoy na ang iyang lawas apan iyaha kining antoson hangtud makuha ang iyang bana nga si Dexter Espinosa, 44.

Ang ginang nitug-an nga nadawat na niya ang posibilidad nga wala nay kinabuhi ang iyang bana kung maugkat human iyang nakita ang mga uwahing mga patay’ng lawas nga nakuha.

Apan gusto niya nga bisan ang lawas nalang ang makuha aron mapahiluna nila kini og tarung.

Nanawagan siya Prime Waste Solutions nga suportahan ang pamilya sa mga trabahador nga naapil sa trahedya.

Si Tumulak miingon nga magpabilin nga search and rescue pa gihapon ang ilang buhaton subay sa mando ni Mayor Nestor Archival tungod kay naglaum sila nga duna pay maluwas nga buhi.

Gitahasan na ni Archival ang  Department of Social Welfare and Development kon DSWD; Department of Labor and Employment ug ang nagdumala  sa kompanya sa maong landfill nga mohimo og mga plano kun unsaon pagtabang ang mga pamilya sa mga naapektahan ilabi na nga kasagaran sa nakalas mga breadwinners sa ilang mga pamilya. IBM BANAT NEWS