MCWD nipasabot kabahin sa minimum charges

CEBU, Philippines — Giklaro sa Metropolitan Cebu Water District ang palisiya sa pagpatuman og minimum charge sa mga konsumidor sa Dakbayan sa Sugbo.

Gipadayag ni Konsehal Harold Kendrick Go diha sa Facebook post nga dili makiangayon nga mangolekta ang MCWD og bayranan sa tubig bisan og walay suplay sa tubig human sa bagyong Tino.

Nunot niini, gipasabot sa MCWD nga ang minimum charge dili bayad sa tubig nga wala mahatag apan usa kini ka “capacity” o “readiness-to-serve” charge.

Gipasabot usab sa MCWD nga ang 70 hangtud 80 porsyento sa gasto sa usa ka water district alang kini sa fixed costs lakip ang utang sa imprastraktura, kuryente sa mga bomba, pagmentinar sa mga pipeline ug suweldo sa mga empleyado.

Gikataho nga ang maong mga gasto nagpadayon bisan og walay actual nga konsumo sa usa ka panimalay aron masiguro ang sestema nga kanunay’ng andam sa paghatag og tubig.

Gitandi sa MCWD ang maong kahimtang sa usa ka subscription diin ang konsumidor nagbayad dili lang sa gidaghanon sa tubig nga gigamit apan sa paghatag og serbisyo ug sa pag-atiman sa imprastraktura.

Ug kong maningil lang kon adunay agas ang tubig mawala ang pundo sa water district alang sa pagmentinar sa sestema ilabi na sa panahon sa kakulang sa suplay o mga service interruption.

Gipahinumdom usab sa water district nga kini usa ka government-owned and controlled corporation nga natukod ubos sa Presidential Decree No. 198 ug gikinahanglan sa balaod nga mahimong self-liquidating.

Dili sama sa mga lokal nga kagamhanan nga wala kini makadawat og regular nga subsidy o Internal Revenue Allotment ug nagsalig lang sa mga kita nga makolekta aron mapadayon ang operasyon.

Gipadayag usab sa MCWD nga ang Water Rates Manual sa Local Water Utilities Administration (LWUA) nagmando sa pagkolekta sa minimum charges aron ma-recover ang fixed costs.

Bisan sa pag-uyon sa baroganan ni Go nga dili madawat ang kakulang sa suplay sa tubig, ang MCWD nagkanayon nga ang solusyon anaa sa dugang nga puhonan sa imprastraktura, water sourcing, ug pressure management dili ang pagtangtang sa minimum charges. Gipasidaan niini nga ang pagwagtang sa maong palisiya makapahuyang sa pinansiyal nga kapasidad sa utility sa pagsulbad sa mga problema sa suplay.

Bukas usab ang MCWD sa pakigpulong ug pakig-alayon sa opisina ni Go aron mangita og hiniusa nga solusyon sa pagpalambo sa serbisyo nga ilang giila nga maoy hinungdan sa kasuko ug kabalaka sa mga konsusmidor. BDB BANAT NEWS