Kapitolyo mo establisar og opisina alang as solo parents

CEBU, Philippines — Isip pagsuporta sa solo parents sa Probinsiya sa Sugbo subay sa nakalatid sa Akta Republika 8972 kun “Solo Parents Act of 2000” ang Probinsiya sa Sugbo pinaagi sa 17th Sangguniang Panlalawigan niaproba sa ordinansa nga mag-establisar og opisina alang sa mga solo parents sa lalawigan.

Ang maong ordinansa nga gitawag nga Cebu Province Solo Parents Affairs Office kun CP-SPAO ordinance gipangamahan ni Bokal Nilo Seno ug co-author si Bokal Lakambini “Neneth” Reluya ug Paz Rozgoni matud sa taho sa Capitol Information Office.

Nasayran nga ang CP-SPAO umolon ubos Provincial Social Welfare and Development Office (PSWDO) ug ang operasyon niini direkta usab sa supervision sa gobernador.

Sa Probinsiya sa Sugbo, adunay 18,486 nga solo parents nga rehistrado base sa datos sa tuig 2024 apan kadaghanan kanila ang wala masayod sa benipisyo ug proteksiyon nga gilaitid ubos sa RA 8972 tungod usab kay wala mapatuman dayon sukad nahimo kining balaod niadtong tuig 2000.

Ubos sa ordinansa nga gipasar sa probinsiya gilaoman nga ma-facilitate ang social integration sa solo parents aron makatabang sa pagwagtang sa stigma sa mga nag-inusara nga ginikanan nga nibarog sa ilang mga anak.

Pinaagi sa CP-SPAO aduna nay morepresentar sa maong sektor ug makahatag kanila og tingog aron ipadangat ang ilang mga concerns lakip na ang pagsiguro nga dili sila mahikawan sa ilang mga katungod, benepisyo ug prebilihiyo nga gigarantiya ubos sa balaod. (BANAT NEWS)