P20 smuggled nga sigarilyo nasakmit

CEBU, Philippines — Mokabat sa P20 milyones nga kantidad sa mga smuggled nga sigarilyo sulod sa usa ka light-duty truck nga gikan sa Negros Oriental ang nasikop sa Barangay Poblacion, Santander habagatang lungsod sa Sugbo atol sa joint intelligence-driven operation niadtong Sabado, Enero 10.

Sa report sa Cebu Police Provincial Office (CPPO), ang mga nasakmit nga kontrabando naglakip sa dili mominos 200 ka kahon nga adunay sulod nga 50 ka ream sa sigarilyo matag usa ug adunay tatak nga brand nga “Oris.”

Sigon sa CPPO nga sa pag-verify sa mga nakumpiska nga sigarilyo, ang Bureau of Internal Revenue (BIR) mikompirmar nga ang brand wala maapil sa pinakaulahing listahan sa mga rehistradong tobacco products nga legal nga gitugutan sa pagbaligya sa Pilipinas, busa gi-categorize ang mga butang isip illegal tobacco products. Ang maong operasyon gihimo mga alas 11 sa gabii sa nahisgutang petsa pinaagi sa hiniusang pagpatuman sa Santander Municipal Police Station, CPPO, Regional Mobile Force Battalion 7, Provincial Intelligence Unit, Regional Intelligence Division, ug sa Regional Special Project Unit 7 (RSPU-7).

Dugang pa, nakig-alayon usab ang BIR, Bureau of Customs, ug Philippine Coast Guard sa operasyon pinaagi sa pagpahigayon og checkpoint base sa verified intelligence report.

Atol sa operasyon, nababagan sa mga operatiba ang usa ka closed van nga Foton Tornado nga gimaneho sa usa ka lalaki ug giubanan sa laing lalaki nga katabang.

Ang duha kinsa wa ibutyag sa CPPO ang ilang pangalan pulos mga residente sa Barangay Ajong, Sibulan sa Negros Oriental.

Sa dugang imbestigasyon nasayran nga gikan sa Negros Oriental ang kargamento sa maong electric light-duty truck nga nitakdo sa mga naunang intelligence reports.

Sa dihang gihangyo ang duha ka mga suspek sa pagpresentar og legal nga mga dokumento alang sa pagdala sa mga sigarilyo, wala sila nakapakita niini.

Human niini, gidakop ang duha ka mga indibidwal, samtang ang mga nasakmit nga sigarilyo ug sakyanan gidala sa buhatan sa RSPU-7 alang sa dokumentasyon ug sa pagpangandam sa pagpasaka sa tukmang kaso ngadto sa korte.

Mag-atubang sila og kasong kalapasan sa Republic Act 10863 o Customs Modernization and Tariff Act of 2016, ug Section 263 sa National Internal Revenue Code, nga nagsilot sa ilegal nga paghupot, pag-transport, ug pag-distribute sa mga ilegal nga produkto sa tabako.

Sumala pa sa CPPO nga ang operasyon gipatuman subay sa walay hunong nga kampanya batok sa pagpayuhot sa sigarilyo.

Sa laing bahin, si CPPO Provincial Director Police Colonel Abubakar Mangelen Jr. nagkanayon nga padayong palig-unon ang border security operations ug koordinasyon sa nasudnong mga ahensya aron mabungkag ang smuggling networks nga naglihok sulod ug palibot sa probinsiya.

Gidayeg usab sa provincial director ang malampusong operasyon batok sa illegal tobacco trade, nga nagpasiugda sa epektibong inter-agency cooperation ug desitibo nga pagpatuman sa balaod sa pagpanalipod sa probinsiya gikan sa economic sabotage nga dala sa smuggling.

Gihatagan usab niya og gibug-aton nga ang paghunong sa mga gidili nga produkto sa tabako nga makasulod sa Sugbo manalipod sa kita sa gobyerno, mapanalipdan ang mga lehitimong negosyo, ug mapadayon ang pagmando sa balaod. — /IBM (BANAT NEWS)