Tulo ka polis, babaye gipamusil patay

CEBU, Philippines —  Patay ang tulo ka polis ug usa ka babaye human sa nahitabong pagpamusil sa kauban ra nilang polis sa managlahi nga lugar sa Sibulan, Negros Oriental niadtong Biyernes, Enero 9, 2026.

Ang mga namatay mao silang Police Captain Jose Edrohil Cimafranca, hepe sa Sibulan Police Station, Police Senior Master Sergeant Tristan Joseph Chua, Patrolman Rey Albert Temblor ug babaye nga sibilyan nga si Sheila Mae Denauanao.

Samtang ang suspek mao si Police Staff Sergeant Bonifacio Saycon Jr., nadestino sa Sibulan Municipal Police Station.

Sa impormasyon sa Police Regional Office Negros Island Region (PRO-NIR) si Denauanao mao ang unang gipusil sa suspek sulod sa resto bar pasado alas-9 sa gabii niadtong Biyernes, Enero 9, 2026.

Paglabay sa pipila ka gutlo gipamusil sab ang tulo ka polis diha sa sulod sa sakyanan diha sa Barangay Tubtubon.

Nasuta sa gihimong follow-up investigation nga sa wala pa ang insidente ang suspek ug ang tulo ka mga gipatay nga polis sa  usa ka sof sulod sa bar uban ang babaye nga biktima.  Ang upat ka polis pulos naka-sibilyan anang tungora.

Basi sa kuha sa CCTV sa maong bar, nakita nga nitupad og lingkod sa grupo ang babaye, ug sa wala'y igong hinungdan nibarog ang suspek ug gipusil ang maong babaye makadaghang higayon nga maoy hinungdan sa hinanaling kamatayon niini. Human sa maong insidente ang suspek ug ang tulo ka polis nakit-an nga nisakay og sakyanan.

Ang mga on duty nga mga polis sa Sibulan Municipal Police Station daling niresponde sa alarma ug matud pa gitug-anan sila sa mga tawo sa bar kung asa padulong ang mga namusil.

Dali silang nigukod sa gitudlo nga direksyon ug nakit-an nalang nila  ang Mitsubishi Lancer nga iya ni Police Captain Cimafranca naka-park daplin sa karsada.

Nakurat sila kay ang tulo nila ka mga kauban apil ilang hepe naa sa sulod ug wala nay kinabuhi.  Dali nila silang gidala sa tambalanan apan gideklarar nga patay na.

Pasado alas-10 sa gabii sa samang adlaw si Saycon boluntaryong nitahan sa kaugalingon sa Tanjay City Police Station.

Si PRO-NIR Regional Director Police Brigadier General Arnold Thomas Ibay mimando og makuting imbestigasyon aning makasubo nga krimen nga naglambigit sa iyang mga sakop.

Si Sibulan Mayor Jose Abiera nasubo sa maong insidente ug mipadangat kini sa iyahang mga pahasubo sa nabiyaang pamilya sa mga biktima.