Mga dalan sa Opon sirad-an para sa traslacion   

CEBU, Philippines — Gipahibalo sa kagamhanan sa Siyudad sa Lapu-Lapu pinaagj sa buhatan sa City Traffic Management System (CTMS) ang road closure ug re-routing nga pagahimoon atol sa traslacion sa Imahen ni Senyor Sto. Niño nga mobisita sa Siyudad sa Lapu-Lapu.

Kini mahitabo sa Enero 16 ug 17, 2026 ug sirad-an sa trapiko ang mga dalan gikan sa Mandaue-Mactan Bridge paingon sa National Shrine sa Birhen sa Regla sa Barangay Poblacion.

 Maepektohan sa maong kalihokan ang mga biyahe gikan sa Siyudad sa Mandaue paingon sa Mactan International Airport.

Dugang maepektohan nga mga dalan ang nagpaingon sa Barangay Poblacion ug ang.mga sakyanan nga mopaingon sa Lungsod sa Cordova.

Hinuon adunay mga designated nga mga parking area diin adto mahimong ibilin ang sakyanan ug maglakaw na lamang sa pagpaingon sa simbahan sa Birhen sa Regla.

Sa adlaw nga Sabado sa alas-4 ang takna sa kaadlawon himoon ang sendoff mass ug dad-on ang Imahe sa Balaang Bata sa  Naval Forces sa Barangay Looc alang sa Fluvial Procession.  Sa pikas bahin, giawhag ang mga politiko dili mosakay sa galleon nga sakyan sa imahen atol sa fluvial procession. Karon palang giklaro nang daan sa kaparian sa sa Basilica Minore del Sto. Niño ang maong patakaran aron dili mamantsahan og kontrobersya ang kalihukan nunot sa isyu sa kurapsyon karon sa ubang mga opisyal sa kagamhanan. Sumala pa ni Fr. Jules Van Almerez ang Media Liason sa Basilica Minore del Sto. Niño nga pwede gihapong makaapil sa fluvial procession ang mga politiko basta sa ilang kaugalingong sakyanan sa dagat ilang sakyan. Mopahigayon og dry run sa fluvial procession karong adlaw nga Biyernes sa mga kaparian, Philippine Coast Guard ug sa Philippine Navy. (BANAT NEWS)