Ulo sa puya gitangag

CEBU, Philippines —  Nakurat ang mga residente sa Sitio Lubas 1, Purok 10, Barangay Campo 7, Lungsod sa Minglanilla human usa ka ulo sa usa ka puya ang gitangag og iro nga nagbahis-bahis sa ilang dalan niadtong Lunes sa hapon, Enero 5, 2026.

Matud ni Jody Opsial, residente sa lugar, gatuo lang sila nga ulo sa monyeka ang gitangag sa iro.

Kay nakuryuso sila og maayo, ilahang gipakuratan ang iro dalang abog aron matan-aw nila kun sa monyeka ba gyud kadto kay mura man gyud og iya sa usa ka gamay nga masuso.

Sa dihang nabuhian ang gitangag dali nila kining gitan-aw ug diha na nila nahibaw-an nga ulo gyud diay kini sa bata.

Gitawag dayon niya ang silingan nila nga barangay tanod nga mao na sab ang nagpahibawo sa barangay kapitan dayon gitawagan ang kapulisan sa Lungsod sa Minglanilla.

"Nakuyawan mi, wala mi kasabot sa among gibati, nganong naay bata diri," sigon ni Obcial.

Gisubay nila ang dapit kun asa posibleng nakuha sa iro ang maong putol nga ulo sa puya sa pamasin nga makit-an nila ang lawas sa bata.  Apan wala sila'y nakit-an nga lawas ug dako ang ilahang pagtuo nga gikaon kini sa irong libusuroy nga nagtangag sa ulo kay nakita nila nga nidako nibusdik og maayo ang tiyan sa inahan nga iro ug sa duha niini ka mga itoy.

Laing molupyo nga si Edwin  Obod misaysay sab nga duna sila'y nakit-an nga daster ug apron dili layo sa gidudahan nilang didto nakuha sa iro ang puya ug gituohan nilang maoy gipangputos niini  tungod kay aduna man kini lama sa dugo.

Gaduda sab siya nga kadtong sakyanan nga nakit-an niya niadtong Domingo sa hapon nga ni-park duol sa ilahang panimalay maoy nagbilin sa bata.

Subay sa maong impormasyon ang Minglanilla Police Station sa pagpangulo ni Police Lieutenant Colonel Maria Theresa Macatangay nihimo na og imbestigasyon bahin niini.

Buot nlang makita ang biological mother sa puya ug sa mga indibidwal nga posibleng dunay kasayuran sa pag-abandonar niini.

Padayon sab ang ilahang pag review sa Local CCTV footage aron mailhan ang mga responsable sa insidente.  Gilubong na ang ulo sa puya sa bone chamber sa Minglanilla Public Cemetery. -