Duha namatay sa pagkalumos

CEBU, Philippines — Patay na nga nakit-an sa sapa sa Purok 7, Barangay Anopog, Lungsod sa Pinamangujan ang usa ka 19 anyos nga lalake.

Ang namatay nagpuyo sa Purok 7, Barangay Anopog, Lungsod sa Pinamungajan ug matud pa dunay sakit nga epilepsy.

Una niini, pasado alas 2 sa kadlawon niadtong Lunes, Enero 5, 2026 ang Pinamungajan Municipal Police Station nakadawat og tawag labot sa insidente sa pagkalumos sa naasoy nga dapit.

Niresponde dayon ang kapulisan kuyog ang Local Disaster Risk Reduction and Management Office personnel.

Base sa imbestigasyon sa kapulisan alas 2 sa hapon niadtong Domingo,  Enero 4 nangisda sa sapa ang maong batan-on.

Naabtan nalang og gabii, wala na kini makauli hinungdan gipangita siya sa mga kabanay ilabi na nga duna kini gihambin nga sakit.

Pagka alas 11:30 sa gabii anang adlawa nakit-an kini sa iyahang igsuon nga nilutaw sa sapa ug wala nay kinabuhi.

Gisusi og maayo ang lawas sa biktima ug wala'y na-obserbar nga senyales sa foul play.   Nagtuo ang inahan nga nisukmat ang sakit niini maong nalumos sa sapa.

Samtang nakit-an na ang 18-anyos nga batan-ong lalake nga na missing niadtong Enero 4, 2026 nga nalumos sab samtang naligo sa kadagatan sa Sta. Ana, Barangay Poblacion Dakbayan sa Toledo.

Ang nalumos Grade 13 student nga taga Sitio Planta, Barangay Tubod, Toledo City.

Sa impormasyon sa Toledo City Police Station nga alas 6:50 sa buntag kagahapon, Martes, Enero 6, 2026 nanawag kanila si Barangay Captain Bernardo Tito sa Barangay. Poblacion may labot sa nakit-ang patay'ng lawas sa kadagatan.

Sigon pa sa pamahayag sa mananagat nga si alyas Roy padung unta siya molawod sa dihang nakita niya ang nagbuy-od nga lawas diha sa babayon maong gipahibalo niya kini dayun sa barangay.

Base sa inisyal nga imbestigasyon sa kapulisan Enero 4 nakitang nagkuyog ang namatay ug duha ka mga higala  sa pagpangligo sa lugar.

Apan giingong nitidlom kini sa lawom nga bahin ug wala matabangi sa mga kauban hangtud nga naabot na sa lawom ug na-missing. (BANAT NEWS)