Motor vs motor, usa patay

MANILA, Philippines —  Padayung giila sa kapolisan sa Lapu-Lapu City Police Office (LCPO) ang usa lalaking rider nga nabangga sa laing motorsiklo diha sa Barangay Looc, Siyudad sa Lapu-Lapu alas-10 pasado ang takna sa miaging Biyernes sa gabii.

Si Police Captain Edcel Petecio, tigpamaba sa LCPO miingon nga sa pakisusi sa mga sakop sa Traffic Enforcement Unit (TEU) nahibaw-an nga ang maong rider gikan kini sa Barangay Poblacion  nga sakay sa motorsiklo. Kusog kini nga nagpadagan sa gimanehong motorsiklo paingon sa Lungsod sa Cordova.

Sa paghidangat sa Barangay Looc nasungag kini sa kasugat nga motor nga giluwanan sa duha ka tawo gikan sa Lungsod sa Cordova paingon sa Barangay Poblacion.

Gumikan sa kusog sa panagbangga ang duha ka mga lalaki nga nag-angkasay sa motorsiklo ang nalagpot ngadto sa daplin sa karsada nga maoy hinungdan sa ilang pagkaangol.

Samtang ang rider nga nalagpot usab sa karsada nawad-an og panimuot sa dihang naabtan sa mga taga ambulansiya ug gidala sab ngadto sa tambalanan apan pipila ka gutlo ang nilabay giingong nakabsan kini sa iyang kinabuhi

Si Petecio miingon nga sa U-box sa maong rider walay sulod dokumento o lisensiya nga mao unta ang mag-ila niini. (BANAT NEWS)