Presyo sa krudo mosaka sunod semana

Posibleng mosaka ang presyo sa diesel sa mga pump stations sunod semana, sumala sa presidente sa Jetti Petroleum, Leo Bellas, tungod sa nagpadayon nga hulga sa global oil supply nga resulta sa geopolitical tension.

Gipahibalo ni Bellas nga ang pagtaas sa presyo sa diesel mahimong P0.20 hangtod P0.40 kada litro, samtang ang gasolina posibleng mosaka o moubos og P0.10 kada litro.

Bisan pa man, sa karong semana, ang presyo sa diesel ug gasolina sa Mean of Platts Singapore nibaba human sa pag-recover sa output sa regional refineries.

Apan ang freight ug premium components sa presyo nagpabiling taas tungod sa kabalaka nga ang geopolitical developments makapahinay sa supply.

Alang sa kerosene, ang Department of Energy nagtan-aw nga adunay posibleng rollback sa presyo og P0.20 kada litro sunod semana, apan wala pa kini apil ang operational costs ug uban pang premiums sa oil companies. Ang final nga price adjustments ipahibalo kada Lunes ug epektibo pagsugod sa Martes, sumala sa impormasyon gikan sa industry officials.

Niaging semana, nisaka ang presyo sa diesel ug kerosene samtang ang gasolina nagpabilin sa parehas nga presyo. (BANAT NEWS)