Pito nabiktima sa pabuto sa Cebu City

CEBU, Philippines — Pito ka mga indibidwal sa Dakbayan sa Sugbo ang nalandig sa Cebu City Medical Center (CCMC) human nga nabuthan og mga pabuto atol sa pagsugat sa Bag-ong Tuig.

Ang mga biktima gipugngan lang ang mga pangalan apan base sa impormasyong gipagawas ni Konsehal David “Dave” Tumulak, tsirman sa Cebu City Disaster Risk Reduction and Management Council (CCDRRMC) nga ang pinakabata nga mga biktima nagpangidaron ngadto sa 7 ug 8 anyos nga mga batang lalaki.

Nagpuyo sila sa Barangay Basak San Nicolas ug Barangay Cogon Pardo kun diin wala mailhi kun unsa nga klase sa pabuto ang nakasamad.

Laing mga biktima mao ang usa ka 13 anyos nga babaye nga naggikan sa Barangay Bacayan ug ang 18 anyos nga lalaki sa Barangay Tinago nga naigo og triangle, ug ang duha ka 19 anyos nga babaye ug lalaki nga gikan sa Barangay Basak Pardo ug Barangay Basak San Nicolas ang naigo og triangle ug piccolo.

Ang katapusang biktima mao ang 37-anyos nga babaye sa Barangay Poblacion, Pardo nga naigo og kwitis. Matud pa ni Tumulak nga ang tanan natambalan sa CCMC ug gipapauli ra sab sa mga doktor sanglit ang mga samad dili kini makamatay.

Sa laing bahin, lima ang natala nga mga disgrasya sa kadalanan kun diin usa ka pasyente nga nadisgrasya sa South Road Properties (SRP) gidala ngadto sa Vicente Sotto Memorial Medical Center (VSMMC).

Laing  mga disgrasya ang nahitabo sa Barangay Talamban, Barangay Mambaling ug Barangay Busay kun diin ang mga nasamdan gidala sa CCMC tungod kay nakaangkon kini og samad. Gawas sa disgrasya, duha ka sunog sab ang natala sa sitio Atis sa Barangay Sambag I kun diin nilanat lang sa 12 minutos una kini napalong ang sunog sa usa ka panimalay.  Nahitabo sab ang usa ka grass fire sa South Hills sa Barangay Tisa kun diin nilanat ngadto sa 35 minutos una napawong ang kayo. IBM BANAT NEWS