CT-TODA mobalik sa ilang operasyon batok sa illegal parking

CEBU, Philippines — Mobalik sa pagpahigayon og operasyon batok sa illegal parking ug paghawan sa sidewalk ang mga sakop sa City of Talisay-Traffic Operation Development and Authority (CT-TODA). Kini maoy gihatag nga tahas kang Jonathan “Joy” Tumulak, pangulo sa CT-TODA ngadto sa iyang mga sakop atol sa gihimo nila nga year-end meeting. Matud ni Tumulak nga uban nila sa operasyon ang nagkalain-laing buhatan sa Talisay City Hall.

Gipahibawo ni Tumulak nga mobalik sila sa istrikto nga pagpatuman sa magpataka og parking sa ilang mga sakyanan.

Samtang sugdan nila ang paghawan sa side walk sa sunod semana aron mabalik ang karsada alang sa motorista. Nagkanayon si Tumulak nga ilang gihatagan og paglugak sa lagda sa trapiko ang katawhan tungod sa nasinati nga mga katalagman. Apan gumikan sa pagsaka sa gidaghanon sa mga motorista nga nadisgrasya mobalik na sila sa ilang operasyon. BDB BANAT NEWS