Wa ka remit gipatay
CEBU, Philippines — Gipusil patay ang usa ka 25 anyos nga lalaki samtang natulog diha sa traysikol nga giparking sa sitio Sambagan, Barangay Tabunok, Dakbayan sa Talisay niadtong Lunes sa kadlawon.
Ang biktima mao si alyas Cedric, 25 anyos nga nagpuyo sa nahisgutang lugar. Ang kapuyo sa namatay nga si alyas Chouyin, 27, nisumbong sa kapolisan nga natulog sila sa iyang kapuyo diha sa traysikol.
Nakamata nalang siya gumikan sa kusog nga pagbuto ug iyang nakita ang usa ka lalaki nga nagkupot og pusil nga misuway sab og pusil kaniya.
Apan swerte nga ang armas sa lalaki wala makabuto hinungdan nga nagdali-dali og ikyas palayo ang maong mamumuno.
Nakita ni alyas Chouyin ang iyang kapuyo nga nagkadugo nga natagak na sa traysikol hinungdan sa iyang pagpangayo og pakitabang.
Si alyas Chouyin nibutyag nga pipila ka adlaw na ang nakalabay nakita ug nadungog niya ang panaglalis sa iyang kapuyo ug sa usa ka ginganlan og alyas Roy labot sa halin sa drugas nga wala ma-remit sa biktima.
Sa gihimong hot pursuit operation sa kapolisan ilang nadakpan si alyas Roy didto sa sitio Mananga, Barangay Tabunok mga alas 9:30 sa buntag. Si Roy gitumbok nga nalambigit sa pagpusil sa biktima.
Ang suspek nakuhaan og usa ka bala sa .38 diha sa iyang possession. Gibalhug sa bilangguan ang suspek ug gikatakdang pasakaan og kasong murder. IBM BANAT NEWS
- Latest
