Bawal nga pabuto

CEBU, Philippines — Gihimug-atan sa Police Regional Office(PRO)-7 ang ilahang hugot nga warning ngadto sa publiko batok sa paggamit og ginadili nga mga pabuto samtang padayun ang kapolisan sa pagpanakmnit og mga pabuto aron malikayan ang aksidente sa pabuto karong  pagsugat sa Bag-ong Tuig unyang tungang gabii.

Sa pagkutlo ning maong balita niabot sa 335 ka prohibited firecrackers nga nagkantidad og P9,250 ang nakompiskar sa PRO-7 units sukad December 16, 2025.

Ang mga confiscated items naka schedule nga gub-on karong January 31, 2026 aron masiguro nga dili na sila makahatag og risgo sa publiko.  Nagpahinumdom ang PRO-7 sa publiko nga ang mga prohibited firecrackers naglakip sa Watusi, Piccolo, Poppop, Five Star (big), Pla-pla, Lolo Thunder, Atomic Bomb, Giant Bawang, Boga, ug ubang firecrackers nga similar nature, ug gikonsiderar nga delikado tungod kay high risk nga makaangol o makapatay, sunog, ug property damage.

Si PRO-7 Regional Director Police Brigadier General Redrico Maranan niapelar og public cooperation ug istriktong pagtuman sa balaod.  "We are calling on our communities to obey the rules and refrain from using prohibited firecrackers. Your cooperation is crucial to ensure the safety of our children, families, and the entire community. Let us all work together to prevent avoidable accidents and injuries," ni Maranan pa.

Sa pikas bahin, gipahinumdoman sa kapolisan sa Dakbayan sa Talisay ang mga nagtinil og armas nga dili magpataka og pabuto niini sa pagsugat sa bag-ong tuig.

Si Police Lt. Col. Homobuno Sayon, hepe sa kapolisan sa Talisay nibutyag nga gidili gyud ang pagpabuto sa armas lisensiyado man o dili. Sa nanglabay nga pagsugat sa Bag-ong Tuig, dunay mga nabiktima sa saag nga bala.

Nanghinaot si Sayon nga mokooperar ang katawhan aron sugaton ang bag-ong tuig nga malinawon ug walay dautang panghitabo.

Samtang gitambagan sab ang mga tawong makainum og ilimnong makahubog nga dili magpalabi niini tungod lang kay dunay okasyon.

Nagkanayon si Sayon nga wala gidili ang pag-inum pero kung mahubog na mas maayo nga kontrolon gyud ang kaugalingon ug maglikay nga makakita og kaaway.— IBM BANAT NEWS